अप्वया वनाच्वंगु सुर्तीजन्य पदार्थया प्रयोग
येँ महानगरपालिका दुनेया होटल व लजय् सुर्तीजन्य पदार्थया प्रयोग अप्वयाच्वंगु दु । सरकारं सुर्तीजन्य पदार्थया (नियन्त्रण व नियमन) ऐन २०६८ हःसां नं कार्यान्वयन जुइ मफुगुलिं उकिया प्रयोग लिपांगु इलय् अप्वयाच्वंगु दु । येँ महानगरपालिका सहरी जनस्वास्थ्य महाशाखां थनया थीथी क्षेत्रय् याःगु अध्ययनय् होटल व लजय् ५४ प्रतिशत सुर्तीजन्य पदार्थया प्रयोग जुइगु यानाच्वंगु लूगु दु ।
महाशाखा प्रमुख नरेन्द्रविलास वज्राचार्यं विगतय् थुकिया प्रयोगय् नियन्त्रणया कुतः जूसां नं सफल जुइ मफयाच्वंगु धासें होटल लजय् आपालं प्रयोग जुयाच्वंगु धयादिल । वय्कःयाकथं न्हापांगु ल्याखय् होटल व लजय् ५४ दशमलव ४ प्रतिशत व निगूगुलिइ पसलय् २९ प्रतिशतं प्रयोग यायेगु यानाच्वंगु दु ।
स्वास्थ्य क्षेत्रय् तकं ५ प्रतिशतं प्रयोग यायेगु यानाच्वंगु दु । सरकारी ज्याकुथिइ २ दशमलव ५ प्रतिशत, नीति ज्याकुथिइ ७ प्रतिशत, धार्मिक क्षेत्रय् २, बैंकय् ४ दशमलव ठ प्रतिशत, बसपार्क व ट्राभल एजेन्सीइ २ दशमलव २ प्रतिशतं सुर्तीजन्य पदार्थया प्रयोग जुइगु यानाच्वंगु अध्ययनय् क्यनातःगु दु ।
दकलय् अप्वः १५ निसें ४० दँ तकया उमेर समूहयापिंसं प्रयोग यायेगु यानाच्वंगु अध्ययनय् क्यनातःगु दु । अध्ययनया ल्याखं मूल्यांकन यायेबलय् ८ निसें १२ गू तगिमय् अध्ययन याइपिंसं दकलय् अप्वः ३९ दशमलव २ प्रतिशत सुर्तीजन्य पदार्थ प्रयोग यायेगु यानाच्वंगु दु ।
स्नातक तगिंया १४ प्रतिशत व साक्षर समूहया १३ दशमलव ७ प्रतिशतं प्रयोग यायेगु यानाच्वंगु लूगु दु ।
सुर्तीजन्य पदार्थया प्रया याइपिं मिसात २९ व मिजंत ७१ प्रतिशत दु । सरकारं थुकिया नियन्त्रण व नियमनया निंतिं २०६८ सालय् ऐन व नियमावली हःगु खःसा २०७१ सालय् नियमन निर्देशिका व उगु हे दँय् प्याकेजिङ छपाई व दृश्यय् सावधानी निर्देशिका हःगु खः । छपाई प्याकेजिङय् लागू जूगु खने ुसां नं प्रयोगय् धाःसा दिउगु मदुनि ।
विगतया दँय् सार्वजनिक थासय् धुम्रपान याइपिंत जरिवाना यानाः शुरु जूगु अभियानतकं अथें हे तना वंगुलिं यानाः आः न्ह्यागुं थासय् नं प्रयोग जुइगु यानाच्वंगु धासें येँया स्वयम्भूस्थित सामुदायिक केन्द्रया अध्यक्ष अमित पाण्डें नियमित ज्याझ्वःया म्हो जूगु धयादिल ।
मृत्युया दकलय् तःधंगु कारक हे सुर्तीजन्य पदार्थया प्रयोग जूगु धासें स्वास्थ्य तथा जनसंख्या मन्त्रालयया प्रवक्ता महेन्द्रप्रसाद श्रेष्ठं आः थुकिया नियन्त्रणया निंतिं सकसिगुं मंकाः कुतःया आवश्यक दुगु खँ कनादिल ।नेपाल प्रहरी येँया ततःधंगु अस्पताल व १०० किलोमिटर जःखः धाःसा प्रयोग व मी मदुगु धासें उकियात नियन्त्रण यायेगुलिइ लगे जूगु दु ।
थ्व हे बैशाख १९ गतेनिसें अभियान हे न्ह्याकागु महानगरीय प्रहरी परिसर येँया प्रहरी नायब निरीक्षक राजेन्द्र पोखरेलं कनादिल । धुम्रपान व सुर्तीजन्य पदार्थं मानव जीवनया आर्थिक, सामाजिक व सांस्कृतिक क्रियाकलापय् तकं नकारात्मक लिच्वः लाकीगु जूगुलिं उकियात नियन्त्रण यानाः सर्वसाधारण जनताया स्वास्थ्य, सुविधा व आर्थिक हितया अभिवृद्धि यायेत वि.स. २०६८ सालय् सरकारं ऐन हःगु खः ।
ऐनय् धुम्रपान वा सुर्ती सेवन यात धाःसा तुरन्त रोक लगे यायेगु व उकथं रोक लगे यायेबलय् माने मजुल वा तःक्वःतःक्वः धुम्रपान प सुर्तीजन्य पदार्थ सेवन यात धाःसा उम्ह मनूयात सार्वजनिक स्थलं पिने हयेगु वा रु १०० तका वा निगुलिं सजायया व्यवस्था यानातःगु दु ।
LEAVE YOUR COMMENTS