प्यक्वःगु ज्ञानमाला बौद्ध जागरण
यल – ÷नेपाल राष्ट्रिय ज्ञानमाला समिति ललितपुर क्षेत्रीय उपसमितिया ग्वसालय् प्यक्वःगु बौद्ध जागरण अभियान ज्याझ्वः जुल । श्री शाक्यसिंह महाविहार, प्रज्ञानन्द स्मृति ज्ञानमाला भजन खलः, थैनाया व्यवस्थापनय् उगु ज्याझ्वः जूगु खः ।
भजन खलःया नायः राजु शाक्यया सभापतित्वय् जूगु ज्याझ्वलय् मंगलादेवी शाक्यं लसकुस यानादीगु खःसा प्रदेश नं. ३ या प्रदेशसभा सदस्य शोभा मूपाहांकथं झायादीगु खः । ज्याझ्वलय् नवासें वय्कलं थः नं मचांनिसें ज्ञानमाला भजनप्रति लगाव दुगु खँ न्ह्यथँसें भगवान बुद्धया उपदेश प्रचार यायेत ज्ञानमाला भजन छगू सशक्त माध्यम जूगु विचाः प्वंकादिल ।
प्रज्ञानन्द ज्ञानमाला स्मृति भजन खलःपाखें ज्ञानमाला भजनपाखें लसकुस यासें न्ह्याःगु ज्याझ्वलय् समितिया मूछ्यांजे इन्द्रमुनी शाक्यं ज्याझ्वःया उद्देश्ययात कयाः जानकारी बीगु झ्वलय् थीथी थासय् उप क्षेत्रीय समिति गठन याना वयाच्वनागु व थःपिं स्वदँया कार्ययोजनाकथं हे न्ह्याः वनाच्वनागु जानकारी बियादीगु खः ।
समितिया नायःलिसें वरिष्ठ म्येँ हालामि रमना श्रेष्ठं ज्ञानमालाया विकास व प्रचार प्रसारया निंतिं सकलें छप्पँ जुयाः न्ह्याः वनेमाःगु विचाः तयादीगु खः । ज्याझ्वलय् विश्वमैत्री ज्ञानमाला भजन मिसा पुचः लुभुपाखें ज्ञानमाला भजन न्ह्यब्वःगु खःसा बौद्ध भजन शिरोमणिलिसें नांजाःम्ह संगीतकार किरण शाक्य व उपासक हेराकाजी अवालेयात भिक्षु चन्द्रगुप्त महास्थविर व मूपाहां शाक्यं दोसल्लां न्ययेकाः हनापौ देछासे सम्मान नं याःगु खः ।
क्षेत्रीय उपसमितिया संयोजक लक्ष्मीबहादुर महर्जनं सुभाय् देछानादीगु ज्याझ्वलय् समितिया सल्लाहकार, केन्द्रीय समितिया पदाधिकारीलिसें थीथी उप क्षेत्रीय समितिया संयोजकपिनिगु नं उपस्थिति दुगु खः ।
LEAVE YOUR COMMENTS