न्यायाधीश जोशी विदाय् च्वन

येँ – सर्वोच्च अदालतया वरिष्ठ न्यायाधीश दीपकराज जोशी हानं बिदाय् च्वंगु दु । थः विरुद्ध महाअभियोग तयेत सत्तारुढ नेकपाया सांसदतय्सं हस्ताक्षर संकलन ज्या न्ह्याकेवं जोशी विदाय् च्वंगु खः । संसदीय सुनवाई विशेष समितिं प्रधानन्यायाधीशय् अस्वीकृत यायेधुंकाः जोशी ताः ई तक घरविदाय् च्वंगु खः ।

ओमप्रकाश मिश्र प्रधानन्यायाधीश नियुक्त जुइधुंकाः जोशी हाकनं सर्वोच्चय् लिहां वःगु खः । लिहां वःसां जोशीयात छुं इजलाश मबिसे तयातःगु खः । लिपा कानुनमन्त्री भानुभक्त ढकाल लिसे गोप्य सहमति लिपा इजलासय् तःगु खँ सूत्रं धाःगु दु । तर गोप्य सहमति कथं राजीनामा मबीवं जोशी विरुद्ध महाअभियोग तयेगु तयारी याःगु खः ।

सूत्रया कथं कानुन मन्त्री ढकाल व जोशीया दथुइ छगू निगू मुद्दा स्वयाः राजीनामा बीगु समझदारी जूगु खः । शैक्षिक प्रमाणपत्र नक्कली व थीथी विवादास्पद फैसलाया कारण क्यनाः जोशीयात संसदीय सुनुवाई समितिं प्रधानन्यायाधीशया लागिं अस्वीकार याःगु खः ।

जोशी कन्हय् शुक्रवाः तक बिदाय् च्वंगु दुसा बिदा लिपा वय्कःया राजीनामा वइगु आशा जुयाच्वंगु दु । तर प्रमुख प्रतिपक्षी नेपाली कांग्रेसं जोशीयात महाअभियोग तल धाःसा उकिया बचाउ यायेगु धासें सरकारयात ख्याच्वः बियाच्वंगु दु ।