सक्व मेलाया लिपांगु दिं अश्वमेघ यज्ञ
किचः सिंह
मिलापुन्हिनिसें सिपुन्हि लछितक थन न्ह्याइगु माधवनारायणया धलं दंकेगु झ्वलय् दकलय् लिपांगु दिं सिपुन्हिकुन्हु अश्वमेघ यज्ञ याइ । अश्वमेघ यज्ञ स्वयां छन्हु न्ह्यः साँवा गणपिंसं शंख पुयाः जाकि ह्वलाः सकल द्यःपिं आह्वान यानाः निमन्त्रणा याइ । थथे द्यःपिंत निमन्त्रण याइबलय् वायु देव छम्हेसित धाःसा निमन्त्रणा याइमखु ।
अश्वमेघ यज्ञ चछि जागर्तन पुजा, होम कलशार्चन पुजा यानाः सछि व च्याकू स्वां, सिन्हः, आखे, ग्वय्, ग्वाः, दां, सिदा, पालं घासा, ग्वयेका, पसूका, कलेग्वप, पंचबल्लभ धकाः वंगःहः, पुहः, अंहः, चसिहः नापं बयर, सतिबयर, तु, कय्गू, गोबर, क्वखं मगाःगु लः आदि दुगु कलेग्वप लःल्हानाः थः मान्यजनपिंत स्वां बियाःकन्हय्कुन्हु नादीइ लछियंकं धलं दंकीथाय् वनाः मिगाः पुजा यानाः ख्यें कालाः चिभ्वय् नयाः माधवनारायणया धलं क्वचायेकीगु खः ।
अश्वमेघ यज्ञ याइबलय् अश्व धाःसा दइमखु उकिया थासय् अश्व भाःपियाः जट्टा दुगु नैंक्याः तइ । थ्व धलं दनेबलय् धलं दंपिं मिसापिं मजिउ जुल धाःसा यज्ञनापं तइमखु । यज्ञ पिने तापाक्क च्वनाः जक स्वये दइ । यज्ञ यायेबलय् मजिउ जूपिं मिसापिं मेगु दँय् हाकनं ब्यागलं च्वनाः यज्ञ यायेमाःगु चलन दु । यज्ञ सिधयेवं इहिपा जुइधुंकूपिं जूसा थः भाःतयात न्हापा लाक्क कलेग्वप व स्वां बीमाःगु चलन दु । थथे कलेग्वप व स्वां बीबलय् भाःतम्हं लंपाः व दां लःल्हानाबीमाः । इहिपा मजूपिं मिसापिनिगु हकय् थः स्वयां थकालिम्हेसित कलेग्वप व स्वां बीमाः ।
यज्ञ याइगु दिं न्हिछि व यज्ञ सिमधःतले छुं नं नये मजिउ । यज्ञ सिधल कि पालं यायेगु चलन दु । पालं याना च्वनीगु इलय् खा हाल धाःसा पालं याये मजिउ, पालं यायेगु त्वःतेमाः । पालं यायेधुंकाः सुथ न्हापां सक्व साखा त्वाःया ज्योतिलि·ेश्वर महाद्यः नापं सुन्दरीघाटय् साँवा गणं शंख पुलकि म्वःल्हुयाः साँवागणनापं माघ हालाः थनया थीथी द्यःयाथाय् चाःहिलाः बलंपुलिइ वनाः लछितक धलं दंकूपिं राजोपाध्याय बाज्यापिंत लंपाः व दां दक्षिणा बियाः थःथःगु छेँय् वनाः लछियंकं धलं दंबलय् थःपिं च्वंगु थासय् मिगाः पुजा यानाः क्वचायेकी । थुगु मिगाः पुजा याइबलय् मिगालय् मि च्याकाः ख्यें कालाः चि दुगु समय् नयाः वयेमाःगु चलन दु ।
अश्वमेघ यज्ञ याइबलय् नारांद्यःयात इहि यायेगु, बाः¥हाः तयेगु, काय्तापुजा नं याइ । बाः¥हाः तइबलय् नापसं च्वंगु द्यःछेँय् तइगु खः । थुगु ज्याझ्वः क्वचायेकाः नारांद्यःयात तुयुगु गां फायेकाः यज्ञकुण्डय् स्वचाः चाःहिइकी । अनंलि नारांद्यःयात आसनय् बिज्याकाः बाज्या व नारांद्यःयात तुयुगु गां फायेकाः बाज्यां पुजापाठ याइ । थथे याइगुलिं नारांद्यःयात अर्धनारांद्यः धकाः नं धायेगु याः ।
थथे यज्ञ याइबलय् भक्तजनतय्सं फुसा सछि व च्याक्वः चाःहिलेमाः । सछि व च्याक्वः चाःहिल धाःसा मनंतुंगु खँ पूवनी धइगु जनविश्वास दु । थुगु यज्ञ याइबलय् चाकःलिं कचि अप्पा तयाः होम याइगु खः । थुगु होम सिधयेकाः यज्ञ यायेत तयातःगु थासय् च्वंगु कचि अप्पा काये फुसा छेँ दनीबलय् जग तइगु थासय् तल धाःसा छेँय् तसकं भिनी, छेँ नं बांलाइ धइगु विश्वास दु ।
LEAVE YOUR COMMENTS