
येँ (नेपालभाषा टाइम्स)÷नेपाल विद्युत प्राधिकरणं येँया लुँहितिइ च्वंगु केन्द्रीय कारागारय् मतया लाइन चानाबिउगु दु । ताः इलंनिसें ध्यबा मपू धासें म्हिगः अन मतया लाइन चानाबिउगु खः ।
कारागारया सुचना अधिकृत मित्रलाल लुइँटेलं कारागार थेंज्याःगु संवेदशील थासय् मतया लाइन मदुगुलिं चान्हय् छुं नं कथंया घटना जुल धाःसा समस्या जुइ फइगु खँ धयादीगु दु । मत मदुगु इलय् कैदी बन्दी दथुइ ल्वापु जुल धाःसा परिस्थिति नियन्त्रण यायेत तकं थाकुइगु खँ वय्कलं धयादीगु दु ।
कारागार थेंज्याःगु थासय् मतया लाइन चाये न्ह्यः विद्युत प्राधिकरणं गुगुं नं कथंया समन्वय मयाःगु धासें थ्व प्राधिकरणया गैरजिम्मेवारी जूगु द्वपं नं वय्कलं बियादीगु दु । कारागारं प्राधिकरणयात छगूत्या करोड स्वयां अप्वः दां पुल मानि । छुं न्हि न्ह्यः जक ३७ लाख तका पुला बिउगु खः ।
सरकारं कारागारया निंतिं माक्व बजेट मफ्याःगुलिं मतया ध्यबा पुले मफयाच्वंगु खँ कँसें वय्कलं तत्काल मतया लाइन स्वाना बीत नं इनाप यानादीगु दु । केन्द्रीय कारागारय् ३५०० म्ह बन्दी दु । अन नक्कली भुटानी शरणार्थी काण्डय् लाःम्ह पुलांम्ह गृहमन्त्री बालकृष्ण खाँणंनिसें लुँ काण्डय् सजाय फयाच्वंम्ह चुडामणि उप्रेती ‘गोरे’ यात नं कुनातःगु दु ।
LEAVE YOUR COMMENTS