गौरवया आयोजनाया ज्या सुस्त
येँ – सरकारं राष्ट्रिय गौरवया रुपय् तयातःगु आपालं धयाथें आयोजनाया प्रगति तसकं नाजुक जुयाच्वंगु दु । पश्चिम सेती, बुढिगण्डकी जलविद्युत आयोजना, कर्णाली करिडोर, कालिगण्डकी करिडोरया प्रगति तसकं म्हो जुयाच्वंगु दु । राष्ट्रिय विकास समस्या समाधान समितिया ४३ क्वःगु बैठकय् थीथी मन्त्रालयं पेश याःगु प्रतिवेदन कथं थीथी आयोजना प्रगति म्हो जक जूगु मखुसे गुलिखे समस्याग्रस्त जुयाच्वंगु दु ।
वंगु झिछदँ निसें दयेकेगु ज्या न्ह्यानाच्वंगु हुलाकी राजमार्गया अवस्था नं अथेहे जुयाच्वंगु दु । उगु राजमार्गया ज्याय् आः तक भौतिक प्रगति २५ प्रतिशत जक जुयाच्वंगु दु । जग्गा प्राप्ति व राजमार्ग दयेकेगु थासय् प्राविधिक जटिलताया हुनिं आयोजनाया ज्या प्रभावकारी जुइ मफयाच्वंगु खँ धाःगु दु ।
राष्ट्रिय गौरवया आयोजनाया रुपय् दुगु बुढिगण्डकी जलविद्युत आयोजनां प्रभावितयात मुआब्जा इनेगु बाहेक मेगु छुं ज्या यायेफयाच्वंगु मदु । अन नीन्हय्गू गाविस प्रभावित जूगु खःसां नं न्हय्गू गाविसयात जक मुआब्जा इनेगु ज्या जूगु दु । आयोजनाया भौतिक प्रगति ९.९ व वित्तिय प्रगति १० प्रतिशत जक जुयाच्वंगु दु ।
सरकारं फुक्कं साधन स्रोत उपलब्ध याकेगु व प्रभावकारी रुपय् क्वःछिनातःगु इलय् फुक्कं ज्या याये क्वचायेकेगु कथं नीछगू आयोजनायात राष्ट्रिय गौरवया आयोजनाया तःगु खः । उकी झिंखुगू आयोजनाया प्रगति ८० प्रतिशत दु । अथेहे निगू आयोजना ५० प्रतिशत दु । अथेहे ५० प्रतिशत स्वयां म्हो प्रगति जूगु आयोजना निगू दु ।
कर्णाली अञ्चलयात यातायात सञ्जालय् स्वायेगु आज्जु कथं दयेकेगु ज्या जुयाच्वंगु कर्णाली करिडोरया अवस्था नं सुस्त जुयाच्वंगु दु । आयोजना प्रगति १२ प्रतिशत जुयाच्वंगु दुसा आर्थिक प्रगति ११ प्रतिशत जक जुयाच्वंगु दु । उगु परियोजना वंगु गुदँ न्ह्यवंनिसें न्ह्यानाच्वंगु खः ।
सरकारं राष्ट्रय गौरवया आयोजनाया रुपय् तयातःगु छुं छुं आयोजना धाःसा चालु आर्थिक दँय् क्वचाइगु चरणय् थ्यंगु दु । उकी ४५६ मेगावाट क्षमताया माथिल्लो तामाकोशी सम्पन्न जुइगु चरणय् थ्यंगु दु । उगु आयोजना वइगु पुस महिना दुने क्वचायेकेगु आज्जु तयातःगु खः । अथेहे वंगु नीन्हय्दँ न्ह्यवंनिसें स्वनिगःया वासिन्दायात लः त्वंकेगु धकाः दयेकाच्वंगु मेलम्ची खानेपानी नं चालु आर्थिक दँय् क्वचाइगु जूगु दु ।
LEAVE YOUR COMMENTS