इच्छाराजया सम्पत्ति जफत

येँ (नेपालभाषा टाइम्स)÷सिभिल सहकारी सञ्चालन यानाः मनूतय्गु ध्यबा नःगु द्वपनय् मुद्दा लानाच्वंम्ह जग्गा व्यवसायी लिसें एमालेया पुलांम्ह सांसद इच्छाराज तामाङया सम्पत्ति जफत यानाः फसे जुयाच्वंपिंत पुलेगु फैसला विशेष अदालतं याःगु दु ।

तामाङयात स्वदँ कैदया सजाय सहित सम्पत्ति जफतया फैसला विशेष अदालतं याःगु खः । अथे हे अदालतं तामाङया कलाः सृजना शाक्ययात नं दत्या कुनेगु व सम्पत्ति जफत यायेगु फैसला याःगु दु । नापं थ्वहे मुद्दाय् ल्हाः दुपिं केशवलाल श्रेष्ठ, मीना श्रेष्ठ, प्रतिक्षा तामाङ व प्रतिष्ठा तामाङया नामय् दुगु सम्पत्ति नं फुक्कं जफत यायेगु फैसला याःगु दु ।

इच्छाराज तामाङं सम्पत्ति शुद्धीकरण निवारण ऐन कथं १ अर्ब ७२ करोड ४४ लाख ५९ हजार ९७ तका व ७५ पैसा बराबरया बं पुलेमाःगु फैसला याःगु खः । वया कलाः सृजना शाक्यं नं १ अर्ब ३ करोड ५४ लाख ४३ हजार ४८७ तका १० पैसा बं पुलेमाःगु फैसला याःगु खः ।

थ्व स्वयां न्ह्यः विशेष अदालतं वंगु माघ ७ गते इच्छराज तामाङ व वया कलाः सृजना शाक्ययात सम्पत्ति शुद्धीकरणया मुद्दाय् दोषी ठहर याःगु खःसा म्हिगः आइतवाः उमित सजाय नं निर्धारण याःगु खः । श्रेष्ठ इच्छाराजया ससःपाजु खःसा मेपिं निम्ह वया म्ह्याय्पिं खः ।

आः उमिगु सम्पत्ति जफत यानाः पीडितपिंत पुलेगु प्रक्रिया न्ह्याइ धाःगु दु । उमिगु विरुद्ध येँया जिल्ला अदालतय् नं मुद्दा लानाच्वंगु दु ।विशेष अदालतया अध्यक्ष टेक नारायण कुँवर, दुजःपिं तेजनारायण सिंह राई व मुरारीबाबु श्रेष्ठया मंकाः इजलासं थ्व फैसला याःगु खः । अदालतं उमिगु सम्पत्ति जफत यायेगु धाःसां आः तामाङ परिवारयाके गुलि सम्पत्ति दनि धइगु खँ धाःसा पिहां मवःनि ।