सांस्कृतिक क्षेत्रया लागि मुद्दा : सडक आन्दोलनया नापनापं आः कानुनी लडाईं नं जुइगु

येँ (नेपालभाषा टाइम्स) – संविधानय् यानातःगु व्यवस्था कथं स्वनिगःयात नेवाः स्वायत्त सांस्कृतिक क्षेत्र घोषणा यायेमाः धइगु माग यासें आः सर्वोच्च अदालतय् रिट तयेगु तयारी शुरु जूगु दु । नेवाः आन्दोलनया ख्यलय् सक्रिय छगू पुचलं वंगु छुं ई न्ह्यवंनिसें स्वनिगः लागायात नेवाः स्वायत्त सांस्कृतिक क्षेत्र घोषणा यायेमाः धकाः माग याना वयाच्वंगु खःसा आः थ्व माग प्राप्त यायेगु लागिं सर्वोच्चय् रिट तयेगु तयारी जूगु खः ।

रिटया लागिं अधिवक्तापिं शंकर लिम्बु, जितेन्द्र वज्राचार्य, युद्ध महर्जन आदि लगायतया वकिलतय्गु पुचः सक्रिय जुयाच्वंगु दुसा उमिसं रिटया व्यहोरा समेत तयार यायेधुंकूगु खँ धाःगु दु। नेपाःया संविधान व कानूनय् गुगुं नं लागाय् छुं छगू जाति विशेषया बाहुल्यता दुसा उगु क्षेत्रय् वहे जातिया सांस्कृतिक क्षेत्र कायम याये फइगु व्यवस्था यानातःगु दु। संविधान व कानूनया थ्वहे व्यवस्थाया लिधंसाय् छुं ई न्ह्यः तिनि गोरखाया बराम जातियात सर्वोच्च अदालतपाखें अज्याःगु स्वायत्त सांस्कृतिक क्षेत्रया व्यवस्था या धकाः सरकारयात निर्देशन बिउगु खः ।

थ्व विषयय् रिटया लागिं तयारी याना च्वनादीम्ह वरिष्ठ अधिवक्ता शंकर लिम्बुं थ्व मुद्दाय् झीपिं त्यात धाःसा थुकिं यक्व अधिकार प्राप्त मजूसां थुगु भूमि नेवाःतय्गु पुर्खौली भूमि खः धइगु कानुनी रुपं हे पुष्टि यायेगु ज्या जुइ धयादिल ।

अथे हे अधिवक्ता जितेन्द्र वज्राचार्यं मुद्दायात शुरुंनिसें हे बल्लाकेगु लागिं द्वलंद्वः नेवाःतय्सं हस्ताक्षर यानाः अदालतय् रिट दर्ता यायेमाःगु बिचाः तयादीगु दु। आः तयार याःगु रिटय् येँ, यल, ख्वप व किपूयात अथे सांस्कृतिक क्षेत्र घोषणा यायेमाःगु माग यानातःगु खँ सीदुगु दु ।

न्हापा हे यायेमाःगु ज्या
देय्या गुगुं थासय् छुं जाति विशेषया बाहुल्यता दु व अन च्वंपिं जाति विशेषया संस्कृति, भाषायात संरक्षण यायेमाःगु आवश्यक जुल धाःसा उकिया लागिं विशेष क्षेत्र, संरक्षित क्षेत्र, स्वायत्त क्षेत्र घोषणा याये फइ धइगु व्यवस्था नेपाःया संविधानय् यानातःगु दु। थनिं न्यादँ न्ह्यः स्थानीय तहया क्षेत्र निर्धारण यायेगु लागिं बालानन्द पौडेलया अध्यक्षताय् सरकारं छगू आयोग गठन यानाः ज्या न्ह्याकूगु खः । उगु आयोगं नगरपालिका, गाउँपालिकाया क्षेत्र निर्धारण याः थें थज्याःगु विशेष संरक्षित क्षेत्रया नं निर्धारण यायेमाःगु खःसां तत्कालीन सरकारं उकी रुची मक्यंगु जुयाः आयोगं ज्या हे पूमवंकं प्रतिवेदन लःल्हाना थकूगु खः ।