निम्हं अध्यक्षत सहअध्यक्ष जुइगु , पार्टी एकता धुंकाः जक सरकार गठनया सम्भावना
येँ – अन्ततः न्हूगु सरकार गठन यायेगु ईया सतिक थ्यंकाः एमाले–माओवादी एकताया स्वरुप तयार जूगु दु ।सूत्रतय्सं धाः कथं आः एमाले अध्यक्ष केपी ओलीया हे नेतृत्वय् सरकार गठन यानाः पार्टीया नेतृत्व धाःसा मंकाः रुपं यायेगु सहमति जूगु दु । आः कम से कम नं पार्टीया मेगु महाधिवेशन मजूतलेया लागिं पार्टीइ अध्यक्ष धइगु पद मतसे केपी ओली व पुष्पकमल दाहाल निम्हेसितं ‘सहअध्यक्ष’ पदय् तयेगु सहमति जूगु खँ सूत्रं धाःगु दु ।
ओली व दाहाल निम्हेसिया जक दथुइ च्वंगु बैठकं थ्व सहमति याःगु खःसां थुकियात निगुलिं पार्टीं स्वीकृत धाःसा मयाःनि ।सूत्रया कथं पार्टी दुने न्हापा माले व माक्र्सवादी एकता जूगु इलय् थें आः नं माओवादीयात अध्यक्ष पद बियाः एमालें कार्यकारी अधिकार सहितया महासचिव पद कायेगु एकता खाका नं न्ह्यःने हःगु खः । तर माओवादीं अज्याःगु ‘सेरेमोनियल अध्यक्ष’ पद धाःसा अस्वीकार याःगु दु । उकिं निम्हेसितं सहअध्यक्ष दयेकेगु प्रस्ताव न्ह्यःने वःगु खः ।
माओवादीं पार्टी अध्यक्षया पद हे माग याःगु खःसां एमाले दुने निगूगु तहया नेतातय्सं थुकियात अस्वीकार याःगुलिं दथुइ समस्या वःगु खः । प्रधानमन्त्री एमालेयात बिल धाःसा राष्ट्रपति पद माओवादीयात बीमाः धइगु मेगु माग नं न्ह्यःने वयाच्वंगु दु । राष्ट्रपति पदय् एमालेया झलनाथ खनालं दावी यानाच्वंगुलिं थुकी नं झंझट वयेफुगु खँ सूत्रं धाःगु दु । पार्टी एकता मजूगुलिं वाम गठबन्धनं सरकार गठनया दावी तकं याये फयाच्वंगु मदुनि ।
दाहाल अभिव्यक्तिया अर्थ
माओवादी अध्यक्ष पुष्पकमल दाहालं छुं ई न्ह्यः चितवनया छगू सभाय् न्ववायेगु झ्वलय् थम्हं हाकनं छक्वः तःधंगु लिच्वः लाइ कथंया ‘फड्को’ कायेत्यनागु दु धकाः बियादीगु अभिव्यक्तियात नं थन थीथी अर्थ बियाः स्वया हःगु दु । सरकार गठन यायेगु ई त्ययेधुंकाः नं पार्टी एकता मजुयाच्वंगु थ्व इलय् अध्यक्ष दाहालया उगु अभिव्यक्ति गनं एमालेयात त्वःताः मेगु हे पार्टीलिसे जानाः सरकार गठन याये त्यना धाःगु जकं मखु ला धकाः नं थुइका हःगु खः । वय्कः पार्टी एकता ताःमलाःगुलिं हीमीचायाः हे चितवन झाःगु खः ।
LEAVE YOUR COMMENTS