ने. सं. ११४६ तछलागा दुतिया -

‘युरेनिम उत्खननया निंतिं सम्झौता जूगु मदु’

सीमा विवाद वार्ताया माध्यमं ज्यंकेगु परराष्ट्र मन्त्रीया धापू, सुस्ताया तटबन्धय् भारतया आपत्ती

येँ (नेपालभाषा टाइम्स) – परराष्ट्र मन्त्री शिशिर खनालं नेपालय् युरिनियम उत्खननया निंतिं सुया लिसे नं सम्झौता जूगु मदुगु खँ धयादीगु दु ।

नेपाली सेना व अमेरिकी सेना दथुइ मुस्ताङ जिल्लाय् युरेनियम मालेगु निंतिं सम्झौता जूगु धकाः चर्चा जुयाच्वंगु विषयय् राष्ट्रिय सभाय् संवोधन यायेगु झ्वलय् परराष्ट्रमन्त्री खनालं थ्व खँय् छुं सत्यता मदुगु खँ धयादीगु खः । वय्‌कलं युरेनियम उत्खननया मामिलाय् अमेरिका जक मखु, सुया लिसे नं छुं कथंया नं सम्झौता जूगु मदु धकाः स्पष्ट यानादीगु खः । वय्‌कलं नेपाःया असंलग्न परराष्ट्र नीति व पञ्चशीलय् आधारित कुटनीतिइ छुं नं लिच्वः लाइकथं सम्झौता मयायेगु प्रतिबद्धता नं प्वंकादीगु खः ।

संसदय् लिसः बीगु झ्वलय् वय्‌कलं सीमा विवादयात वार्ताया माध्यमं हे ज्यंके गु खँ नं हाकनं लिसा कयाः धयादीगु दु । वय्कलं भारतलिसे दुगु सीमा सम्बन्धी समस्यायात ऐतिहासिक सन्धि, नक्सा व तथ्यया आधारय् कुटनीतिया माध्यमं हे समाधान यायेगु खँय् सरकार प्रतिबद्ध दुगु खँ धयादीगु खः ।

संसदय् न्ववायेगु झ्वलय् वय्‌कलं कलं पश्चिम नवलपरासीया सुस्ता गाउँपालिकाय् नारायणी खुसि सिथय् दयेकाच्वंगु तटबन्धयात कयाः भारती पक्षं आपत्ति प्वंकूगु खँ जानकारी बियादीगु दु ।

नेपाःया सशस्त्र प्रहरी बल व भार तया सीमा सुरक्षा बल (एसएसबी)या मंकाः पुचलं पश्चिम नवलपरासीया सुस्ता गाउँपालिका ५ व भारतया पश्चिम चम्पारण, रामपुर्वास्थित सीमा क्षेत्रय् अनुगमन याःगु इलय् नारायण खुसि सिथय् सिँचाइ तथा जलस्रोत व्यवस्थापन आयोजना, भरतपुरपाखें दयेकाच्वंगु तटबन्धयात कयाः सहलह जूगु खँ धयादीगु दु । उगु सहलहय् नेपाली भूभागय् हे दयेकाच्वंगु छगू किलोमिटर तटबन्धय् भारतीय पक्षयात छुं आपत्ति मदुसां पूर्वपाखे थप १३२ मिटर न्हूगु तटबन्ध दयेकेगु खँय् धाःसा भारतीय पक्षं द्विपक्षीय वार्ता लिपा जक दयेकेत इनाप याःगु खँ जानकारी बियादीगु खः ।

थ्वहे दथुइ फिब्वख्यलय् धर्ना च्वनाच्वंपिं सुस्तावासीतय्त गृहमन्त्री सुधन गुरुङं नापलाःगु दु । सुस्ताय् भारतीय एसएसबीतय्‌सं नेपाःया लागाय् दुहां वयाः थःपिंत धम्की बीगु याना वयाच्वंगु धासें उपिं थःपिंत लालपुर्जा व नागरिकता बीत माग यानाः धर्ना च्वना वयाच्वंगु खः ।