नेपाः–चीनया ऊर्जा संयन्त्र

येँ –  नेपाः व चीन दथुइ दयेकूगु ऊर्जा संयन्त्रया न्हापांगु बैठकया तिथि क्वःजिउगु दु । प्रधानमन्त्री केपी शर्मा ओलीया वंगु जुनय् जूगु चीन भ्रमणया झ्वलय् निगू देय् दथुइ ऊर्जा सम्झौताय् हस्ताक्षर जूगु खः । नेपाःया ऊर्जा, जलस्रोत व सिँचाईमन्त्री वर्षमान पुन व चीनया ऊर्जा मन्त्री नुर बेक्रीं उगु समझादारी पतिइ हस्ताक्षर याःगु खः ।

समझदारी कथं निगुलिं देशं ऊर्जा क्षेत्रयात ध्यानय् तयाः मंकाः कार्यान्वयन संयन्त्र दयेकेगु सहमति जूगु खः । नेपालं उगु सम्झौता कथं न्हय्म्ह दुजः दुगु संयन्त्र दयेकूगु दु । उकिया सहअध्यक्षय् ऊर्जा सचिव अनुपकुमार उपाध्याय च्वनादीगु दु ।

समितिइ उर्जा महाशाखा स्वइम्ह सहसचिव, ऊर्जाया हे कानुन स्वइम्ह सहसचिव, परराष्ट्र मन्त्रालयया चीन महाशाखा स्वइम्ह सहसचिव, विद्युत विकास विभागाया महानिर्देशक, नेपाल विद्युत प्राधिकरणया कार्यकारी निर्देशक सदस्य कथं च्वनीगु व ऊर्जा मन्त्रालयया हे सीडीई बाबुराम अधिकारी सदस्य सचिव कथं च्वंगु दु ।

चीन व नेपालं ऊर्जा क्षेत्रयात ध्यानय् तयाः मंकाः कार्यान्वयन संयन्त्र दयेकेगु सहमति जूगु खः । नेपालं उगु सम्झौता कथं न्हय्म्ह दुजः दुगु संयन्त्र दयेकूगु दु ।

ऊर्जा मन्त्री पुनं चीनलिसे जूगु सहमतियात न्ह्यःने न्ह्याकेत संयन्त्रया बैठक सःतेत निर्देशन बीधुंकाः उकिया उकिया निंतिं तिथि नं क्वःछी धुंकूगु दु । नेपालं तःगु बैठकया प्रस्तावय् चीनं सहमति क्यनेधुंकूगु दु । निगुलिं पक्षया सहमति कथं वइगु सेप्टेम्बर २७ व २८ गते संयन्त्रया निगू पक्षीय बैठक येँय् च्वनेत्यंगु खः ।

चिनिया पक्षं बैठकय् ब्वति काये न्ह्यः एजेन्डा छ्वयाहयेत नेपाःयात इनाप याःगु दु । ऊर्जा मन्त्री सहित ऊर्जा मन्त्रालयय् आइतवाः च्वंगु बैठकं चीनयात छ्वयेगु एजेन्डा नं क्वःछी धुंकूगु दु । बैठकय् निगू देय् दथुइ अन्र्तदेशीय प्रशारण लाइन व ग्रिड कनेक्सन, निगू देय् दथुइ मंकाः कथं दयेके फइगु सम्भावित जलविद्युत आयोजना व ऊर्जा क्षेत्रय् यायेफइगु सम्भावना बारे सहलह जुइगु खँ धाःगु दु ।

अथेहे प्रधानमन्त्रीया चीन भ्रमणया झ्वलय् नेपालं प्रस्ताव याःगु न्हय्गू जलविद्युत आयोजना व खुगू प्रशारण लाइनयात नं न्ह्यःने न्ह्याकेगु विषयलय् सहलह जुइगु खँ धाःगु दु । बैठक क्वचायेवं ऊर्जा मन्त्री पुन चीन भ्रमणय् वनीगु कार्यसूचि नं दयेकूगु दु । चिनिया समकक्षी नुर बेक्रीया निमन्त्रणाय् मन्त्री पुन वइगु अक्टोबरय् चीन वनीगु ज्याझ्वः दु ।

वय्कलं चीन भ्रमणया झ्वलय् थः समकक्षी नाप निगू पक्षीय वार्ता यायेगु लिसें ‘बेल्ट एन्ड रोड इनर्जी मिनिस्ट्रियल कन्फ्रेन्स’य् ब्वति काइगु ज्याझ्वः दु ।

 

सम्बन्धित बुखँ

LEAVE YOUR COMMENTS