पशुपतिइ चान्हय् फोहर वाः वःम्हेसित ज्वन

येँ –  विश्व सम्पदाया धलखय् लानाच्वंगु पशुपतिया जंगलय् फोहर वाये यंकूम्ह छम्ह चालकयात ज्वंगु दु । चान्हसिया इलय् पशुपति क्षेत्र दुनेया जंगलय् फोहर वाये यंकूगु धासें बा २ ख २६८८ नंया चालकयात स्थानीय वासिन्दां ज्वनाः गौशाला प्रहरी वृत्तयात लःल्हाना बिउगु खः ।

वंगु आइतवाः चान्हसिया इलय् तिलगंगा–गुह्येश्वरी लँपु जुयाः विश्व सम्पदाया लानाच्वंगु पशुपतिया जंगलय् फोहर वायेत वनाच्वंम्ह गाडी चालक सुदीप खड्कानापं सवारीयात नं स्थानीयवासीं नियन्त्रणय् कयाः कारवाहीया निंतिं वडा ज्याकूयात बुझे याना बिउगु गौशाला प्रहरी वृत्तया प्रहरी नायब उपरीक्षक सुनील मल्लं कनादीगु दु ।

उगु इलय् फोहर वायेत वःम्ह गाडी चालकयात वइगु दिनय् पशुपति क्षेत्रय् फोहर मवायेगु शर्त व न्याद्वः दां जरिवाना यानाः त्वता छ्वयागु येँ महानगरपालिका वडा नं ८या वडाअध्यक्ष दिनेश डंगोलं कनादिल । लुमंकेबहजू, विश्व सम्पदाया धलखय् दुथ्यानाच्वंगु ऐतिहासिक पशुपति लागाया जंगलया दथुइ च्वंगु लँपु चायेकेवं संयुक्त राष्ट्र संघीय निकाय युनेस्कों पशुपतियात हे विश्व सम्पदाया धलखं चिइकेगु ख्याच्वः बी धुंकूगु दु ।

सम्बन्धित बुखँ

LEAVE YOUR COMMENTS