भाषा आयोग बजेटविहिन
येँ (नेपालभाषा टाइम्स)÷बजेट समस्यां यानाः भाषा आयोग ज्या मदयेकाः सुम्क च्वनेमाःगु अवस्था वःगु दु । चालू आर्थिक दँया लागिं सरकारं गुगुं बजेटया व्यवस्था मयाःगुलिं आयोगय् ज्या यायेत समस्या जुयाच्वंगु खः ।
ज्या यायेत बजेट मदयाः लोपोन्मुख भाषाया अध्ययन, अभिलेख, संरक्षण लगायतया ज्या प्रभावित जूगु दु । बजेट मदयाः आयोगया च्याम्ह पदाधिकारी सहित ४९ म्ह कर्मचारी ज्या मदयेकाः सुम्क च्वनेमाःगु दु ।
नेपाःया न्हूगु संविधान जारी जुइधुंकाः नीस्वंगु आयोग पदाधिकारी नियुक्त मजुयाः प्यदँ तक अध्यक्ष डा. लवदेव अवस्थीया एकल नेतृत्वय् सञ्चालन जुयाच्वंगु खः । तर आः न्हूम्ह अध्यक्ष डा. गोपाल ठाकुर व न्हय्म्ह दुजः दुसां बजेट मदयाः ज्या न्ह्याके मफुगु खँ धाःगु दु ।
आर्थिक मन्दीया कारणं थीथी निकाय व क्षेत्रय् सरकारं बजेट क्वपालेगु झ्वलय् आयोगया लागिं छुं नं कथंया बजेटया मतःगु खँ सीदुगु दु । आयोग बजेट शून्य जूगु खनाः थः अजूचाःगु खँ आयोगया अध्यक्ष ठाकुरं धयादीगु दु । अध्यक्ष ठाकुरया कथं आयोगय् बजेट मदयाः शब्द संकलन, शब्दकोष दयेकेगु, व्याकरण च्वयेगु ज्या तकं प्रभावकारी रुपं न्ह्याके फयाच्वंगु मदु । वय्कलं राष्ट्रपतियात लःल्हाःगु आयोगया न्हय्क्वःगु वार्षिक प्रतिवेदनय् नं थ्व खँ न्ह्यथनातःगु दु ।
बजेट मदयाः भाषिक सर्वेक्षण, मांभाय् छ्यलेगु नितिं यायेमाःगु सम्भाव्यता अध्ययन, विद्यालयय् भाषिक नक्सांकन, लोकवार्ता संकलन, समाज भाषा वैज्ञानिक सर्वेक्षण, नेपाली भाषाया अध्ययन, शास्त्रीय भाषाया अध्ययन, नेपालय् प्रचलित लिपिया अध्ययन, सांकेतिक भाषा सम्बन्धी ज्याझ्वः, भाषा सम्बन्धी प्रचारमुखी श्रव्यदृश्य सामग्री, भाषिक इतिहास लेखन, भाषिक पाठ संकलन, मांभासं शिक्षणया नितिं पाठ्यसामग्री दयेकेगु व वंगु इलय् जूगु अध्ययन प्रकाशन यायेगु ज्याय् पंगः वयाच्वंगु् दु ।
उकथं हे आयोगया रणनीतिक मार्गचित्रय् लाःगु आदिवासी भाषाया अन्तर्राष्ट्रिय दशक कार्यान्वयन सम्बन्धी ज्याझ्वः व प्रदेशय् सरकारी ज्याखँय् थीथी भाषा छ्यलेत सहजीकरण यायेगु ज्याय् नं समस्या जुयाच्वंगु दु ।
अध्यक्ष डा. ठाकुरं आयोगया दुरावस्था बारे राष्ट्रपति रामचन्द्र पौडेल, प्रधानमन्त्री पुष्पकमल दाहाल, विभागीय मन्त्री सुदन किराँतीपिंत इनाप यानागु व उकी प्रधानमन्त्री दाहालं छुं यायेगु आश्वासन बिउगु खःसां आः तक बजेटया व्यवस्था धाःसा मयाःगु खँ नं कनादीगु दु । बजेट शून्य जूगुलिं प्रशासनिक खर्च व तलब भत्ताय् जक खर्च जुयाच्वंगु दु । आयोगं आर्थिक दँया नितिं ३ करोड बजेट माग याःगु खः । न्हूगु ज्या यायेमफुगुलिं कर्मचारीत हाजिर यानाः सुम्क च्वनाच्वंगु दु ।
LEAVE YOUR COMMENTS