जैशीदेवल क्लबया सम्मान ज्याझ्वः

येँ -जैशिदेवल युथ क्लबं अन्तर्राष्ट्रिय तेक्वान्डो रेफ्री शुद्धोधनमान रंजित वंगु शनिवाः छगू ज्याझ्वः यासें विशेष सम्मान याःगु दु । थनया जैशिदेगःया स्थानीयवासी रंजितयात अमेरिकी प्रहरीं यौन दुरुचारया द्वपं बियाः अनया हिरासतय् तयाः मुद्दा चले यानातःगु खः । अमेरिकया सर्वोच्च अदालतं भाजु रंजितयात बियातःगु सकतां आरोप असत्य जूगु धासें सफाई बिउगु खः ।

वय्कःया बियातःगु मुद्दा असत्य जूगुलिं उकिया हे सम्मान यायेकथं क्लबं वय्कःयात सम्मान याःगु खः । ज्याझ्वलय् सन् १९८८ लय् लस एन्जलसय् जूगु ओलम्पिकय् तेक्वान्डोय् कास्य पदक त्याकादीम्ह विधान लामायात नं सम्मान याःगु खः । वय्कःपिंत क्लबया नायः राजेश प्रजापतिं ख्यें सगं बियाः खादा व स्वांमाः क्वखायेकाः सम्मान यानादीगु खः ।

ज्याझ्वलय् नवासें क्लबया नायः प्रजापतिं तेक्वान्डो कासापाखें नेपाःया नां तयेत सफल कासामिया पक्षय् अमेरिकी सर्वोच्च अदालतं सत्यया पक्षय् फैसला न्यंकाः रंजितयात न्याय बिउगुलिं थःपिं नं अतिकं लय्ताःगु खँ कनादिल । क्लबया नायः प्रजापतिया हे सभापतित्वय् न्ह्याःगु ज्याझ्वः क्लबया दुजः राजेन्द्र मानन्धरं न्ह्याकादीगु खः ।