समावेशी पत्रकारिताया निंतिं मिले जुयाः न्ह्याः वनेमाःगु खँय् जोड

यल – राज्यसत्तापाखें लिउने लानाच्वंपिं, लाकातःगु वर्ग व समुदायया मुद्दायात संचारमाध्यमय् थाय् बीकेत व समावेशी पत्रकारिताया निंतिं संचारलिसें सम्बन्धित संघसंस्थात मिले जुयाः न्ह्याः वनेमाःगु खँय् वक्तातय्सं बः बिउगु दु । तामाङ संचार समूह यल शाखाया न्हापांगु अधिवेशनया उलेज्याझ्वलय् वक्तातय्सं उगु खँय् बः बियादीगु खः ।अधिवेशनया उलेज्या यासें गोदावरी नगरपालिकाया उपप्रमुख मुना अधिकारीं नगरपालिकां पत्रकारतय्त दक्ष दयेकेया निंतिं आवश्यक ग्वाहालि यायेगु प्रतिवद्धता प्वंकादिल । लिसें वय्कलं पत्रकारतय् संगठनं नं जवाफदेही दयेकेत महत्वपूर्ण भूमिका म्हितीगु विश्वास प्वंकादिल । ज्याझ्वलय् समूहया केन्द्रीय उपाध्यक्ष दिपेन्द्र दोङं संचार ख्यःयात समावेशी दयेकेत समूहं याना वयाच्वंगु ज्याया बारे जानकारी बियादीगु खःसा मूछ्यांजे विष्णु मोक्तानं मानव विकास व राज्यसत्तापाखें बहिष्करणय् लानाच्वंपिं तामाङ समुदायया मुद्दायात संचारमाध्यमय् थाय् बिकेत सकसियां नापं सहकार्य यानाः वनेगु जुइ धयादिल ।

समूहया यल जिल्ला कचाया अध्यक्ष साहिँला तामाङया सभापतित्वय् जूगु ज्याझ्वलय् नेपाल पत्रकार महासंघया केन्द्रीय दुजः जानुका, बराल, नेवाः पत्रकार राष्ट्रिय दबूया मूछ्यांजे सुनील महर्जन, नेपाल पत्रकार महासंघ यल शाखाया अध्यक्ष ज्ञानप्रसाद पौडेल, प्रेस सेन्टर यलया अध्यक्ष रामहरि कार्की, प्रेस युनियन यलया उपाध्यक्ष केदारनाथ दाहालं लगायतं पत्रकारिताया हकहितया विषयय् थःथःगु नुगःखँ तयादीगु खः । थ्व हे झ्वलय् तामाङया अध्यक्षताय् समूहया न्हूगु ज्यासना पुचःया नं ल्यज्या याःगु दु । तामाङया अध्यक्षताय् नीस्वंगु न्हूगु ज्यासना पुचःया उपाध्यक्षय् जिबी लामा, सचिवय् लक्ष्मी तामाङ, कोषाध्यक्षय् कविराज तामाङयात ल्यःगु दुसा दुजलय् बबिता घिसिङ, शान्ति थिङ, बाबुलाल स्याङताङ, श्याम लामा, प्रकाश तामाङ व बुद्धराम थिङ च्वनादीगु दु ।