पद्मावती सहकारीया नीन्याक्वःगु साधारणसभा
यल – पद्मावती बचत तथा ऋण सहकारी संस्थाया नीन्याक्वःगु वार्षिक साधारण सभा वंगु शनिवाः तःजिक क्वचाल । संस्थाया अध्यक्ष नेमवीर शाक्यया सभपातित्वय् जूगु साधारण सभाया उलेज्या लोक साहित्यविद् वाङमय शताब्दीपुरुष डा. सत्यमोहन जोशीं यानादीगु खः ।
सभाय् संस्थाया अध्यक्ष नेमवीर शाक्यं लसकुस यानादिसें आर्थिक दँ २०७४÷७५ या वार्षिक प्रतिवेदन, आर्थिक प्रतिवदेन व आ.व. २०७५÷७६ या अनुमानित बजेट न्ह्यब्वयादीगु खः । ज्याझ्वलय् २२ गू थीथी मित्र सहकारीपाखें पद्मावतीया नीन्याक्वःगु साधारण सभाया निंतिं भिंतुना देछागु खः ।
अथेहे ज्याझ्वलय् राष्ट्रिय सहकारी विकास बोर्डया निर्देशक शिवप्रसाद घिमिरे, जिल्ला सहकारी संघ यलया उपाध्यक्ष रामशरण बस्नेत, लुम्बिनी बौद्ध विश्वविद्यालयया उपकुलपति प्रा. डा. नरेशमान वज्राचार्य, लेखा संयाजक बाबुराजा महर्जनपिंसं भिंतुना देछायादीगु खः ।
संस्थाया रजत महोत्सवया लसताय् संस्थाया पुलांपिं अध्यक्ष रोशनकुमार शाक्य, इन्द्रमुनि शाक्य व संस्थाया प्रतिनिधि जुयाः सहकारी क्षेत्रय् डिप्लोमा यानादीम्ह निवर्तमान कोषाध्यक्ष लक्ष्मी शाक्य, अध्यक्ष नेमवीर शाक्ययात वहया मेडल व थीथी क्षेत्रं ग्वाहालि यानादीपिंत हनेज्या यासें मतिनाया चिं लःल्हाःगु खः ।
साधारण सभा न्ह्यः पद्मावती महाविहार नःबहालय् संस्थाया ज्याकू न्ह्यःने दयेकूगु रजत महोत्सव स्तम्भया उलेज्या लोकसाहित्यविद व शताब्दी पुरुष डा. सत्यमोहन जोशीं यानादीगु खः ।
LEAVE YOUR COMMENTS