आः तरकारि बजाःया सिन्डीकेट त्वाःथलीगु

देय्या थीथी ख्यलय् कायम जुयाच्वंगु सिन्डीकेट (एकाधिकार) त्वाःथलेगु अभियानया झ्वलय् सरकारं आः तरकारिइ खने दुगु सिन्डीकेट नं त्वाःथलीगु जूगु दु । यातायात ख्यलय् तःदँ न्ह्यवंनिसें कायम जुयाच्वंगु एकाधिकार त्वाःथलेगु सरकारी कुतःया सफलता लिपा आः तरकारि मीगु ख्यलय् खने दयाच्वंगु सिन्डीकेट नं त्वाःथलेगुपाखे सरकार न्ह्याः वनेत्यंगु खः ।

कालिमाति तरकारि तथा फलफुल विकास समितिपाखें संचालन जुयाच्वंगु तरकारि विक्री केन्द्रय् तकं एकाधिकारी दुगु धइगु जनगुनासो जनस्तरतक न्यना वनेवं कृषि, भूमि व्यवस्थापन तथा सहकारी मन्त्रालयं आः याकनं हे थुकिया सिन्डीकेट (एकाधिकार) नं अन्त्य यायेगु न्ह्यथंगु दु । कालिमाति तरकारि तथा फलफुल विकास समिति राज्यपाखें हे संचालन जुयाच्वंगु निकाय खः । उगु तरकारि बजाः २०५५ सालय् स्थापना जूगु खः ।

व हे इलंनिसें छथ्वः सीमित व्यापारीतय्सं मनोमानी रुपं तरकारि बजाः संचालन याना वयाच्वंगु दु ।कृषि, भूमि व्यवस्थापन व सहकारीमन्त्री चक्रपाणि खनालं कालिमाति तरकारि तथा फलफुल विकास समितिया बजाः संचालन नियमावली संशोधन यानाः जूसां तरकारि विक्री वितरणय् खने दयाच्वंगु एकाधिकार अन्त्य यायेगु जानकारी बियादिल । तरकारि व्यवसायी महासंघया अध्यक्ष सोमप्रसाद घिमिरें नियमावलीं बिउगु अधिकार व्यापारीं प्रयोग याःगु धयादिल ।

बजार विकास समितिया बजाः संचालन नियमावलिं छखा हे छेँया छगू पुस्ताया अन्त्य जूसां उगु हे छेँया मेगु पुस्तां व्यवसाय संचालन मयाःगु हकय् जक मेगु पक्षं विक्री कक्ष बालं काये दइग प्रावधान दु । राष्ट्रिय कृषक समूह महासंघ नेपालया अध्यक्ष उद्धव अधिकारीं पुस्ता दरपुस्तां यकःतिरुपं तरकारि बजाः संचालन यानाच्वंगुलिं तरकारिया भाः थहां वंगु धयादिल ।

विकास समिति संचालनया नेतृत्व नेपाल सरकारं याइगु ख । झन्डै ४५ रोपनी जग्गाय् न्यना वनाच्वंगु विक्री केन्द्रया कार्यसमितिइ किसान, व्यवसायी व स्थानीय जनप्रतिनिधि दइगु व्यवस्था दु । राज्यं क्वःछिनातःगु भावय् व्यापारीं सटर बालं बीगु व व हे सटर व्यापारी हाकनं मेगु पक्षयात बालं बीगु परम्परां तरकारिया भाः निदुगं थिके जूगु उपभोक्तातय् धापूलिपा निगुलिं पक्षया एकाधिकार अन्त्यया निंतिं सहमति लिक्क थ्यंगु धाःगु दु ।

कालिमाति तरकारि तथा फलफुल विकास समितिं ६०१ विक्री कक्ष स्थानीय व्यवसायीतय्त उपलब्ध याकातःगु दु । उकीमध्ये १० गू सिसाबुसा, १८ गू न्या, कृषक समूहया ज्याकूया १५ गू, आलु प्याजया निंतिं ७० गू व बाहिरी विक्री कक्षा ७० गू व ल्यं दुगु ४१८ वाउँचा तरकारि विक्री कक्षपाखें तरकारि विक्री वितरण जुया वयाच्वंगु दु ।थौंकन्हय् न्हिं लगभग स्वंगू करोड नीन्यागू लाख तका बराबरया तरकारि कारोबार जुया वयाच्वंगु दु ।