मेलम्चीया लःयात नं गुणस्तर चिं

येँ – नेपाःया संविधान कथं आः मेलम्ची खानेपानी आयोजना व मेमेगु लः कम्पनीतय्सं नं नेपाल गुणस्तर चिं कायेमाःगु अवस्था वःगु दु । नेपाःया संविधान २०७२ या मौलिक हक अन्तर्गत धारा ३५ उपधारा ४ सं प्रत्येक नागरिकयात स्वच्छ त्वनेगु लः व सरसफाइलय् पहुँचया हक दइ धकाः व्यवस्था यानातःगु दु ।

उगु हे व्यवस्था कथं नागरिकं त्वनीगु लःया स्वच्छ जूगु सुनिश्चित यायेत नेपाल गुणस्तर चिं अनिवार्य यायेत धयातःगु दु । मंगलवाः च्वंगु संसद विकास समितिया बैठकं खानेपानी मन्त्रालययात थज्याःगु निर्देशन बिउगु खः । आः स्वनिगलय् इनीगु लःया नं गुणस्तर चिं कायेमाःगु अवस्था वःगु दु ।

संसदया बैठकय् खानेपानी मन्त्री बिना मगरं सन् २०३० तक फुक्कं नागरिकयात स्वच्छ लः त्वंकेगु निंतिं वार्षिक १ खर्ब बजेट माःगु खःसां नं आः ३४ अर्बं तकां ज्या यायेमाःगु गुनासो प्वंकादीगु दु । लिसें मेलम्ची खानेपानीं लःया गुणस्तर चिं कायेगु निंतिं थम्हं हे प्रक्रिया न्ह्याकृमाःगु खँ गुणस्तर तथा नापतौल विभागया महानिर्देशक विश्वबाबु पुडासैनीं कनादीगु दु ।

महानिर्देशक पुडासैनी थःपिंसं गुणस्तर जक चेक यायेगु खः धासें मेलम्ची व लः कम्पनींतय्सं गुणस्तर चिंया निंतिं प्रक्रिया न्ह्याकल धाःसा थःपिंसं ग्वाहालि यायेगु खँ कनादिल ।