‘थबहीली दयाच्वंगु विकृति अन्त्य यायेमाः’
येँ – नेपाःया हे छगू प्रमुख पर्यटकीय गन्तव्य जुयाच्वंगु थबही (ठमेल) यात बांलाःगु गन्तव्य दयेकेगु निंतिं थन खने दयाच्वंगु विकृतिया अन्त्य यायेमाःगु खँ धाःगु दु । महानगरीय प्रहरी परीसर पाखें याःगु छगू अन्तक्र्रिया ज्याझ्वलय् सहभागीपिंसं थबहीलय् जुइगु रात्रिकालीन व्यवसाययात व्यवस्थित यायेमाःगु खँय् बः बिउगु खः ।
ज्याझ्वलय् न्ववासें येँ महानगरपालिका २६ वडाया अध्यक्ष ख्यामराज तिवारीं प्रहरी व स्थानीइ सरकारं जक थबही क्षेत्रयात शान्त यायेफइमखु धासें थुकी अन व्यवसाय यानाच्वंपिं व्यवसायीत नं न्ह्यचिलेमाःगु व अनया व्यवसायीतय्सं थःपिनिगु सोच बिचारय् हिउपाः हयेमाःगु खँ धयादीगु खः ।
अथेहे १७ वडाया अध्यक्ष नवीन मानन्धरं समृद्ध थबही दयेकेत व्यवसायी, प्रहरी व स्थानीय सरकार दथुइ सहकार्य यायेमाःगु खँ बः बियादिलसा १६ वडाया अध्यक्ष मुकुन्द रिजालं व्यवसायीतय्सं थःपिनि सम्पूर्ण विवरण प्रहरी व स्थानीय तहयात बिल धाःसा जक व्यवसाय सुरक्षा जुइफइगु खँ धयादिल । महानगरीय प्रहरी वृत्त लैनचौरया प्रमुख डिएसपी गौतमकुमार केसीं थबहिली जुइगु बालश्रम, श्रम शोषण व यौन शोषण विरुद्ध प्रहरी कडा जुयाः कारवाही याइगु खँ धयादिल ।
ज्याझ्वलय् न्ववानादिसें महानगरीय प्रहरी परिसर काठमाडौंया प्रमुख एसएसपी उत्तमराज सुवेदीं नेपाल भ्रमण दँ २०२० यात सफल यायेत शान्त, सभ्य व व्यवस्थित थबही दयेकेमाःगु खँ धयादिसें व्यवसाय दर्ता, कर्मचारीया पारिश्रमिक स्पष्ट जूसा, सिसिटिभी जाडन, मतया व्यवस्था व यौनजन्य हिंसाया अन्त्य यायेफुसा जक सुन्दर थबही दयेकेफइगु खँ धयादिल ।
LEAVE YOUR COMMENTS