ख्वपया मरि पसलय् अनुगमन

ख्वप – ख्वप नगरपालिकाया अनुगमन समितिया दुजः व ख्वप नगरपालिकाया ६ वडा अध्यक्ष हरिराम सुवालया नेतृत्वय् वंगु पुचलं कमलविनायक, दत्तात्रय व सुखुध्वाखा लागाय् चले यानाच्वंगु मरी पसलय् अनुगमन यात ।

पुचलं अनुगमनया झ्वलय् लेबल तया मतःगु, भुतूू फोहर जूगु, ज्वरे यायेगु थलभारा सफा मजूगु, पुलांगु नसा ज्वलं मिउगु, पसःया शौचालय फोहर जूगु, म्याद फुगु सामान लूगु, ज्यामितय्सं एप्रोनया प्रयोग मयागु, पसः नविकरण मजूगु, पेटीइ सामान तयेगु याःगु व माःगु स्वयां अप्वः रंग छ्यलातःगु लुइकूगु खः ।

अनुगमन पुचलं त्रुटित भिंकाः थःपिनि पसः चायेकेत सचेत याकूगु खः । उमित नगरपालिकाय् स्वापू तयेत नं इनाप याःगु खः । अनुगमन पुचलं अन तयातःगु म्याद फुगु खाद्य पदार्थ नं नष्ट यानाबिउगु खः । अनुगमनय् ख्वप नगरपालिका नापं खाद्य प्रविधि तथा गुणस्तर निर्धारण विभाग, जिल्ला जनस्वास्थ्य कार्यालय, राष्ट्रिय उपभोक्ता मञ्च, महानगरीय प्रहरी परिसर, उद्योग वाणिज्य महासंघया प्रतिनिधित नं दुथ्याःगु खः ।

अथेहे ख्वप नगरपालिकाया अनुगमन समितिया संयोजक व ३ वडाया अध्यक्ष राजकृष्ण गोराया नेतृत्वय् वंगु पुचलं जगातिनिसें च्याम्हसिंह लागाय् च्वंगु मरी पसलय् अनुगमन यात ।

अनुगमनया झ्वलय् आपालं पसलय् सरसफाईया कमी जूगुया नापं मरीइ माःगु स्वयां अप्वः रंगया छ्यालाबुला जूगु, नये मजिउगु चिकं छ्यःगु, पसः नविकरण मजूगु, पुलांगु नसा ज्वलं मीगु यानाच्वंगु, नसाय् लेबल मतःगु, धः तराजु नवीकरण मयाःगु, ज्यामितिय्सं एप्रोन मछ्याःगु थेंज्याःगु कमी कमजोरी खनेदुगु खँ धाःग दु ।

अनुगमन पुचलं थीथी पसलय् च्वंगु मरीचरी नष्ट यायेगुया लिसें उगु कमी कमजारी भिंकेगु निंतिं सचेत याकूगु खः । अनुगमनया इलय् ख्वप नगरपालिका वडा नं. ६ या वडा अध्यक्ष हरिराम सुवाल, ख्वप नगरपालिका स्यानिटेशन शाखाया कर्मचारी नापं खाद्य तथा गुण नियन्त्रण विभाग, ख्वप स्वास्थ्य कार्यालय, राष्ट्रिय उपभोक्ता मञ्च, महानगरीय प्रहरी परिसर नापं उद्योग वाणिज्य संघया प्रतिनिधित दुथ्याःगु खः ।

सम्बन्धित बुखँ

LEAVE YOUR COMMENTS