बलात्कारीयात कडा सजायँ
नेपालय् लिपांगु इलय् बलात्कारया घटना अप्वया वयाच्वन धाःसां जिउ । शायद थ्वहे कारणं यानाः जुइ लिपांगु इलय् बलात्कारीयात फाँसीया सजाय बीमाः धकाः सः थ्वयाच्वंगु जुइ । गुलिखे मिसा अधिकारकःमितय्सं बलात्कारीयात फाँसीया सजायया माग यासें येँया माइतीघर मण्डलाय् पेटिकोट पुनाः प्रदर्शन नापं याःगु दु ।
अथे ला बलात्कारीयात फाँसीया माग यानाः प्रदर्शन यायेगु धइगु सामान्य खः तर पेटिकोट पुनाः प्रदर्शन याःगु धाःसा यक्व चर्चा जुल । सत्तारुढ दलया गुलिखे नेतातय्सं थ्वयात गलत ब्याख्या नं यात । नेकपाया नेता, सांसदतय्सं ला थ्वयात नांगां प्रदर्शन व नेपाः विरोधी धकाः व्याख्या यात ।
पेटिकोट पुनाः बलात्कारीयात फाँसीया माग यायेगु धइगु नांगां प्रदर्शन व नेपाः विरोधी धायेगु पाय्छि जू ला ? संकिपाय् म्युजिक भिडियोलय् गुलिखे कलाकारत मोडेलत अर्धनग्न जुयाः अभिनय याइ । संकिपा ‘कथा काठमाडांै’लय् छम्ह मिसा कलाकारं थःगु ब्रा नापं त्वःतल । अथे हे लिपांगु इलय् पत्रपत्रिका, सामाजिक संजालय् मिसा पिनिगु अर्धनग्न किपात छ्याप छ्याप्ति प्रकाशित जुयाच्वंगु दु ।
अभिभावकत नं थुकी सचेत जुइ फयाच्वंगु मदु । अथे हे बलात्कार थेंज्याःगु जघन्य अपराधया मुद्दाय् न्याय सम्पादन सम्बन्धी निकायत नं गम्भिर मजूगु खनेदु । देशय् अप्वया वयाच्वंगु बलात्कारया घटनायात नियन्त्रण यायेत कडागु व स्यल्लाःगु कानून माःगु खनेदु ।
अथे हे मिस वल्र्डय् टु पिस बिकिनी वसः पुनाः दुनियाँया न्ह्यःने नेपाल सुन्दरीं क्याटवाक याइ थ्व चाहिं नांगां मजू अले पेटिकोट पुनाः थःगु अधिकारया लागि प्रदर्शन याःगु जक गय् जुयाः नांगां जुइ ? लिपांगु इलय् नेकपाया गुलिखे सांसद मन्त्रीतय्सं थः यःयःथे नवायेगु यानाच्वंगु दु धाःसां जिउ । थथे न्ववाःगु कारणं यानाः छम्ह मन्त्रीया मन्त्री पद हे चबुत ।
थौंकन्हय् सत्तारुढ दलया कार्यकर्ता नेता सांसद मन्त्रीतय् घमण्ड बढे जुयाच्वन । थुपिं थौंकन्हय् एकदम घमण्डी जुयाः पिहां वयाच्वन धकाः नं राजनीतिक ख्यलय् चर्चा जुयाच्वंगु दु । थौंकन्हय् नेकपाया नेतातय्गु घमण्ड च्वापुया च्वकाय् थ्यनाच्वन धाइ । थुमित सरकारय् दुई तिहाइ बहुमत नं पचे मजू थें च्वं धकाः नं धायेगु यानाच्वंगु खनेदु ।
बलात्कारीयात फाँसी बीमाः धकाः पेटिकोट पुनाः प्रदर्शन याःगुयात विरोध व समर्थन यायेगु त्वःताः थुकी गहन रुपं छलफल व बहस यायेमाः । कडा कानूनया अभावं बलात्कारया घटना अप्वयाच्वन धकाः नं धायेगु यानाच्वंगु दु । लिपांगु इलय् ला बलात्कार लिपा हत्या यायेगु नं अप्वया वयाच्वंगु खनेदु ।
अथे ला बलात्कारीयात फाँसीया सजायया माग यानाः शान्तिपूर्ण कथं प्रदर्शन याःपिंत राज्यं याःगु धरपकडयात सरकारया दमनकारी नीति धकाः विरोध नं यायेगु यानाच्वंगु दु । लोकतन्त्रय् थःगु अधिकारया लागि शान्तिकथं प्रदर्शन नाप याये मदु ला धकाः नं सरकार प्रति आक्रोश प्वंकेगु नं याःगु खनेदत । लिपांगु इलय् देशय् बलात्कारया घटना बढे जुया च्वंगु नं खनेदु ।
न्हियान्हिथं धइथें बलात्कारया घटनात मिडियाय् वयाच्वंगु खनेदु । देशय् लगभग ९ प्रतिशतं बलात्कारया घटना बढे जुयाच्वंगु दु धकाः सरोकारवालातय्सं धायेगु यानाच्वंगु खनेदु । सुयां इच्छा बिपरित डर त्रास धम्की क्यनाः जबर्जस्ति शारीरिक सम्पर्क कायम यायेगुयात सामान्यतया बलात्कार धायेगु याइ ।
थुज्वःगु बलात्कारया घटनायात गम्भिर अपराध कथं कायेमाः । लिपांगु इलय् गांगामय् जक मखुसें शहरी लागाय् नं बलात्कारया घटनात अप्वया वयाच्वंगु खनेदु । वंगु दँय् येँया दरबार लागाय् जक बलात्कारया घटना अप्वःगु चर्चा जूगु खः । लिपांगु इलय् मचा लिसे बृद्ध तक नं बलात्कारया शिकार जूगु समाचारत वयाच्वंगु खनेदु ।
अथे ला गुिलखे बलात्कारया घटनात ला पिहां तक नं वइ मखु । अथे हे गुलिखे बलात्कारया घटनात पीडक पीडित मिले जुयाः आर्थिक लेनदेनं फासफुस याना छ्वयेगु नं याः । थुकिं यानाः नं बलात्कारया घटनात बढे जुयाच्वंगु व बलात्कारीतय् मनोबल बढे जुयाच्वंगु खः धायेमाः ।
धाइ, नेपालको कानून, दैवले जानुन् ।
आःला झन् नेपाःया कानून ओलीले जानुन् धकाः नापं धायेगु यानाच्वंगु दु । नेपालय् बलात्कारीयात बीगु सजाय कानून कडा मजू धकाः नं धायेगु याः । कडागु बल्लाःगु स्यल्लाःगु कानूनया अभावं न बलात्कारया घटना म्हो मजूगु खः धायेमाः । बलात्कारीयात सजाय जूसा बलात्कारीयात खास हे लिच्वः लाःगु खने मदु नं धाइ ।
गुलिखे बलात्कारया घटनाय् उजुरी नापं तइ मखु । बलात्कारया घटनाया उजुरी तल कि अथें बदनाम जुइगु । अदालत तक थ्यनीबलय् प्रमाण हे नष्ट जुइगु । पर्याप्त प्रमाण मुंके मफइगु । पर्याप्त प्रमाणया अभावय् बलात्कारी छुटे जुइगु । अथे हे गुलिखे बलात्कारया घटनात ला अदालत तक हे थ्यने फयाच्वंगु मदु ।
अप्वः धइथें बलात्कारया घटनात आर्थिक लेनदेन व मिलापत्रय् सीमित जुयाच्वंगु दु । बलात्कारीतय्त बीगु सजाय कडा जुइमाःगु सरोकारवालातय् धापू दु । देशय् बलात्कारीयात फाँसीया सजायया माग यानाच्वंगु अवस्थाय् राज्य सरकारं कडा कानून दयेकाः बलात्कारीयात कडा सजाय बीमाःगु खनेदु ।
अथे ला समाज गुलि खुल्ला जुया वन उलि हे समाजय् विकृति बिसंगति खने दया वइ धकाः नं धाइ । बलात्कारया घटना नं समाजया बिकृतिया हे उपज खः । देशय् बलात्कारया घटना बढे जुयाच्वंसां उकिया कारणत माले फया च्वंगु मदु । अथे ला नाबालक बलात्कारया घटनात थःथिति व म्हसिउपिंपाखें हे जुइगु नं गुलिखे केशय् खने दयाच्वंगु दु ।
अथे ला बलात्कारया घटनाया सुक्ष्म कारणत मालेग कुतः सरकारं यानाच्वंगु मदु धाःसां जिउ । अय्नं प्रहरीया अनुसन्धान कथं थीथी कारणत न्ह्यःने वःगु खनेदु ।
देशय् गरिबी, अशिक्षा अप्वः दुगु समाज, बैदेशिक रोजगारी व बेरोजगारीं मिसापिंत मिजं तय्सं स्वयेगु गलत दृष्टिकोण, सामाजिक संजालया गलत प्रयोग, गलत संगतय् लानाः रेष्टुरेण्ट मसाज पार्लरय् मिसात अप्वः वनीगु, संकिपातय् हिरोनीतय्सं याइगु अंग प्रदर्शन बलात्कारया दृश्यत, अश्लील वेब पेजत आदि थीथी कारणं यानाः बलात्कारया प्रबृत्ति खने दया च्वंगु खः ।
अथे हे अभिभावकत नं थुकी सचेत जुइ फयाच्वंगु मदु । अथे हे बलात्कार थेंज्याःगु जघन्य अपराधया मुद्दाय् न्याय सम्पादन सम्बन्धी निकायत नं गम्भिर मजूगु खनेदु । देशय् अप्वया वयाच्वंगु बलात्कारया घटनायात नियन्त्रण यायेत कडागु व स्यल्लाःगु कानून निर्माण यायेमाःगु खनेदु । विद्यमान कानून कथं बलात्कारीयात बीगु सजायनं जक बलात्कारया घटनायात नियन्त्रण याइगु खने मदु धाःसा जिउ ।
LEAVE YOUR COMMENTS