निर्वाचन आयोगयात राप्रपाया ख्याच्वः

येँ -थःपिनि विधान संशोधन या धकाः निर्वाचन आयोगं बियाहःगु निर्देशनयात राप्रपां अस्वीकार याइगु जूगु दु । म्हिगः च्वंगु राप्रपाया केन्द्रीय पदाधिकारीतय्गु मुँज्यां थ्व निर्णय याःगु खः । निर्वाचन आयोगं राप्रपाया विधानय् उल्लेख जुयाच्वंगु ‘सनातन हिन्दू राष्ट्र’ व ‘संवैधानिक राजतन्त्र’ धयागु बुँदा संविधान अःखः जूगुलिं उकियात चीकेमाःगु व पार्टीया ध्वाँचय् तयातःगु सा चिंयात नं हुया छ्वयेमाःगु निर्देशन बिसें पौ छ्वया हःगु खः ।

आयोगं राप्रपायात वंगु माघ २ गते हे अज्याःगु पौ छ्वया हःगु खःसां राप्रपापाखें उकियात लिसः मबिउ धकाः पार्टीया पुलांम्ह नायः कमल थापां राप्रपा नेतृत्वया आलोचना यानादीगु खः । लिसें आयोगया थ्व निर्देशनयात थःपिंसं पालना याये फइ मखु धकाः नं वय्कलं हे धयादीगु खः ।

थापाया थज्याःगु वक्तव्य पिहां वयेधुंकाः तिनि म्हिगः राप्रपाया अध्यक्ष राजेन्द्र लिङदेनं पदाधिकारीतय्गु बैठक सःताः आयोगया निर्देशन पालना याये मफइगु धापू सार्वजनिक यानादीगु खः ।

राप्रपां न्हापा थ्वहे विधान व चिं कयाः चुनाव समेत ल्वायेधुनागु खँ न्ह्यथँसें अबलय् वैधानिक जूगु थ्व खँ आः जक छाय् अवैधानिक जुल धकाः न्ह्यसः नं थंगु दु । निर्वाचन आयोगं थःपिंत नियतवश प्रहार यायेत स्वःगु खनेदु धासें राप्रपां आयोगयात थःपिंसं ‘उपयुक्त इलय्’ लिसः बीगु जुइ धकाः ख्याच्वः नं बिउगु दु । राप्रपां आयोगया थ्व पौयात कयाः कानुनी व राजनीतिक उपचार मालेगु खँ नं धाःगु दु ।

सम्बन्धित बुखँ

LEAVE YOUR COMMENTS