ने. सं. ११४४ कौलाथ्व पारू - नःलास्वनेगु

यल लाय्कूया कोत दयेकेज्या अलपत्र

येँ – भारतं दयेका बी धयातःगु यल लाय्कू लागाय् च्वंगु कोत भवन भुखाय् ब्वःगु स्वदँ पूवनेधुंकाः नं आः तक दयेकेगु सुरु तकं यायेफुगु मदुनि । पाटन स्मारक संरक्षण तथा दरबार हेरचाह कार्यालयया प्रमुख काजीमान प्याकुरेलं भारतीय दूतावासं दयेका बी धाःगुलिं मेमेगु संस्थां नं वास्ता मयाःगुलिं आःतकं दयेके मफयाच्वंगु खँ धयादीगु दु ।

भुखाचं स्यंगु थीथी स्मारक दयेकेगु निंतिं भारतीय दूतावासं याःगु सम्झौताय् कोतपाटी नं दयेकेगु खँ न्ह्यथनातःगु खः । तर दूतावासं आःतक थ्व भवन दयेकेगु खँय् वास्ता मयानाच्वंगु खँ प्रमुख प्याकुरेलं धयादीगु दु ।

भारतीय दूतावासं बेवास्ता यानाच्वंगुलिं स्थानीय वासिन्दातय्सं आः थ्व भवनया पुनःनिर्माण यायेत यल महानगर–पालिकायात इनाप याःगु दु । यल मनपाया मेयर चिरिबाबु महर्जनं नं थ्व भवन पुनःनिर्माणया निंतिं सहकार्य यायेत यल उद्योग वाणिज्य संघलिसे सहलह यायेगु खँ धाःगु दु ।

मंगलबहुद्वार चैत्य पुनःनिर्माण क्वचाल

स्वयम्भूइ च्वंगु मंगलबहुद्वार चैत्य पुनःनिर्माण ज्या क्वचाःगु दु । विश्व सम्पदा धलखय् लाःगु थ्व चैत्य १९ औं शताब्दीइ दयेकातःगु अनुपम चैत्य खः । स्वदँ न्ह्यव ब्वःगु तःभुखाचं दुंगु थ्व चैत्य पुनःनिर्माण लिपा थौं जीवनन्यास पुजा यानाः सर्वसाधारणया निंतिं चायेकीगु जूगु दु । न्यास पुजाया झ्वलय् गजू छायाः हारतीमां व शान्तिपुली क्षमा पुजा नं याइगु खँ स्वयम्भु व्यवस्थापन तथा संरक्षण महासमितिया महासचिव महेन्द्ररत्न बुद्धाचार्यं कनादीगु दु ।

थ्व चैत्य युनेस्को, पुरातत्व विभाग, महासमिति, द्यःपाःलाःत, त्रिभुवन विश्वविद्यालयया स्वयंसेवक विद्यार्थीतय् सहकार्यय् चीनया हाइनान प्रान्तय् च्वंगु छहाङ फाउन्डेशनया आर्थिक ग्वाहालिं पुनःनिर्माण याःगु खः ।