गुह्येश्वरी जात्राया झ्वलय् क्षमा पुजा

येँ – गुह्येश्वरी द्यःया जात्राया झ्वलय् बसन्तपुलिइ क्षमा पुजा याःगु दु । तलेजु भवानीया केहेँ कथं कयातःम्ह गुह्येश्वरीया जात्राया झ्वलय् वंगु कछलागा एकादशिकुन्हु बसन्तपुलिइ उगु क्षमा पुजा याःगु खः । गुह्येश्वरी जात्राया निंतिं तलेजु भवानीयात उखेपाखे यंकूगु खःसा वंगु शुक्रवाः गुरुजुया पल्टनं बसन्तपुलिइ लित हःगु खः ।

तलेजुया पुजारी कछलागा सप्तमिया दिंकुन्हु गुह्येश्वरीइ वनाः बासं च्वनेवं गुह्येवरी द्यःया जात्रा विधिवत रुपं शुरु जूगुकथं कायेगु याइ । वयांकन्हय् कुन्हु अस्तमिकुन्हु तलेजुया पुजारीं गुह्येश्वरीया पुजा यानाः नवमि कुन्हु तलेजु भवानीयात कुहां बिज्याकी । थुकुन्हु हे यःसिं थनेधुंकाः तलेजु भवानीयात कायेत गुह्येश्वरीया स्थानीय वासिन्दा बसन्तपुलिइ वइगु खः ।

तलेजु भवानीयात गुह्येश्वरीइ यंकेधुंकाः चछि निम्ह तःकेहेंयात नापं तयाः चछियंकं हे पुजा यायेगु याइ । दशमिकुन्हु पशुपतिया थीथी लागाय् निम्हं द्यःया खः चाःहिकेगु याइसा उकुन्हु हे बहनि तलेजुयात बसन्तपुलिइ बिज्याकी । क्षमा पुजा यायेधुंकाः तलेजु भवानीयात थहां बिज्याकी ।

बसन्तपुलिइ लित हयेधुंकाः हँय्सहितया बलि बियाः क्षमा पुजा यायेधुंकाः देवीयात हाकनं न्हापा हे थासय् तये यंकीगु पशुपति अमालकोट कचहरीया द्वारे पूर्ण डंगोलं कनादिल । बालाचः¥हेया दिंकुन्हु तलेजुया पुजारीयात गुह्येश्वरीं विदा बीधुंकाः करिब च्यान्हु ताःहाकःगु गुह्येश्वरीया जात्रा नं क्वचाःगु जुइ ।

तत्कालीन येँ देय्या जुजु प्रताप मल्लया पालंनिसें हे थ्व जात्रा शुरु जूगुकथं माने याना वयाच्वंगु दु । प्रदेशसभा सदस्य नरोत्तम वैद्यं कनादीकथं मल्ल जुजुया पालय् काजीया रुपय् ज्या याइम्ह नवमि भारों थ्व जात्रा शुरु याःगु धइगु अभिलेख लुया वःगु जानकारी बियादिल । वय्कलं कनादीकथं जात्रा चले यायेगु निंतिं उम्ह काजीं हे गुथि तकं स्वनादीगु खः ।