शिक्षा ऐनय् मांभासं शिक्षाया माग

येँ -पुलांगु शिक्षा ऐन संशोधन यायेत हःगु न्हूगु विधेयकय् मांभासं आखः ब्वंकेगु अधिकारयात सम्बन्धित समुदाय दुने जक सीमित यायेत स्वःगु खँयात कयाः भाषाह्यमितय्सं विरोध याःगु दु ।

न्हूगु शिक्षा ऐन संशोधनय् प्राथमिक तहलय् मांभासं आखः ब्वंकेगु अधिकार सकसिकें दइ तर अथे यानाः आखः ब्वंकेबलय् उकिया लागिं माःगु सम्पूर्ण व्यवस्थापनया ज्या सम्बन्धित समुदायं हे यायेमाः धकाः च्वयातःगु बुँदाया विरोध यासें म्हिगः नेपालभाषा एकेदमिया पदाधिकारीतय्सं शिक्षा मन्त्री गिरिराजमणि पोखरेलयात नापलाःगु खः ।

वय्कःपिंसं विधेयकय् तयातःगु थज्याःगु बुँदायात संशोधन यासें उकिया थासय् मांभासं आखः ब्वंकेत सुं नं समुदायं चायेकातःगु स्कूलया बजेट व व्यवस्थापनया जिम्मा सरकारं कायेमाःगु, प्रदेश दुनेया थीथी आदिवासी जनजातितय्सं आधारभूत शिक्षा मांभासं काये दये माःगु व प्रदेश दुनेया विद्यार्थीतय्सं थःथःगु मांभाय् बाहेक मेगु छगू राष्ट्रिय भाय् नं ब्वने दयेमाःगु माग शिक्षामन्त्री समक्ष न्ह्यब्वःगु खः ।

शिक्षामन्त्री पोखरेलं मागपत्र लःल्हानाः कासें मन्त्रालययाके बजेट कम जक दुगु जूगुलिं थ्व आर्थिक दँय् ज्या सुरुवात जकसां यायेगु बचं बियादिल । मागपत्र बीत चित्तरंजन नेपाली, यज्ञरत्न धाख्वा,मल्ल के. सुन्दर, डा. पुष्पराज राजकर्णिकार आदिपिं झाःगु खः ।