शनिवाःनिसें म्हासुख्वाः माजुया जात्रा

सक्व- थनया ऐतिहासिक धार्मिक व सांस्कृतिक ल्याखं अतिकं महत्वं जाःगु म्हासुख्वाः माजु (वज्रयोगिनी)या जात्रा कंसंनिसें न्ह्यायेत्यंगु दु । दँय्दसं ल्हुतिपुन्हिया न्हिकुन्हुनिसें च्याचा गुन्हुतक न्ह्याइगु थुगु जात्रा सक्वया छगू छगू त्वालं पाः कयाः न्यायेका वयाच्वंगु दु ।

थुगुसी इल्ला त्वालं पाः कयाः जात्रा संचालन यायेत्यंगु दुसा पाः काःगु त्वालय् हे जात्रा यानाः द्यः तयेगु याइ । जात्रा स्वयां न्ह्यः म्हिगः ३२ कु ताःहाकःगु यःसिं थंगु खःसा वइगु २ गते उगु यःसिं क्वःथइ । अनंलि जात्रा याइम्ह म्हासुख्वाः माजुयात सक्वया गुँ बहालं खतय् तयाः क्वत हइ । म्हासुख्वाः माजुया मूर्तिलिसें सिंघिनी, ब्यांघिनी व स्वयम्भू महाचैत्य नं नापं हयाः जात्रा याइ ।

च्याचा गुन्हुतक न्ह्याइगु जात्राया झ्वलय् दकलय् न्हापां पुन्हिकुन्हु द्यः कुहां बिज्याकी । अनंलि पारुकुन्हुयात शुन्य, दुतियाकुन्हु नखः धकाः नखत्या ब्वनेगु, तृतियाकुन्हु जात्राया निंतिं क्वत हःपिं सकलें द्यःयात सक्व बजाः चाःहिइकी । थुकथं हे चौथिकुन्हु मू भुज्याः पञ्चमिकुन्हु धुँ भुज्याः षष्ठि कुन्हु बौ बिज्या, सप्तमिकुन्हु द्यः थहां बिज्याकेगु व अष्टमि कुन्हु द्यः खः वज्रयोगिनीइ यंकाः जात्रा क्वचायेकी । औपचारिक रुपं जात्रा क्वचाःसां दशमि व एकादशिकुन्हु विचाः पुजा जुइ ।

थौं स्वयां करिब स्वद्वः दँ न्ह्यः सक्व देय् पलिस्था जूगु इलय् सक्वया जुजु शंखदेवं थःगु राज्य अन्तर्गतया न्हय्गू गामय् जनताया सुख, शान्ति, समृद्धि, कल्याणया हेतु थ्व जात्रा न्यायेकूगु धइगु खँ मणिशैल महावदानय् न्ह्यथनातःगु सक्वया संस्ृकतिविद् प्रकाशमान सक्वं ‘नेपालभाषा टाइम्स’ यात जानकारी बियादिल ।

जात्राया निंतिं येँ लाय्कुलिं राज खड्ग हयेमाःगु परम्परा आतकं कायम हे जूगु जानकारी बियाािदसें संस्कृतिविद् श्रेष्ठ जात्राज्वःछि सक्व देय् दुने सुनानं छ्यंगू लाकां न्ह्यायेगु, कुसां कुइगु, ल्वापु ख्यापु यायेगु, साहुं क्यंकेगु व क्यनेगु, साहुं ज्वने मजिउगु, लुसि ध्यनेगु, भम्चा दुकायेगु, छेँ दनेगु थुनेगु, कःसि वा पल्लिइ च्वनाः छुं नं ज्या याये मजिउगु, सल, किसि गये मजिउगु आदि नियम दुगु नं खँ कनादिल ।