छत्रपाटी चिकित्सालयया ६३ क्वःगु वार्षिकोत्सव

येँ – छत्रपाटी निःशुल्क चिकित्सालयं ६३ क्वःगु वार्षिकोत्सव हंगु दु। चिकित्सालयया अध्यक्ष डा. मनोजमान श्रेष्ठया सभापतित्वय् जूगु ज्याझ्वलय् मूपाहांकथं येँ महानगरपालिकाया प्रमुख विद्यासुन्दर शाक्य झायादीगु खः ।

मूपाहां येँ मनपा प्रमुख शाक्यं चिकित्सालयया विकासया निंतिं न्ह्याबलें थें निरन्तर ग्वाहालि यानाच्वनेगु प्रतिवद्धता प्वंकादिल । अथे हे येँ मनपा उपप्रमुख हरिप्रभा खड्गी श्रेष्ठं चिकित्सालयं बिया वयाच्वंगु सेवायात कयाः च्वछायादिसें प्रगतिया कामना यानादिल ।

ज्याझ्वलय् २० दँ स्वयां अप्वः सेवा यानादीपिं कर्मचारीतय्त सम्मान पत्र नं लःल्हाःगु खः । थुकथं हे चिकित्सालयय् लगनशील जुयाः सेवा बियादीपिं मिखा ल्वय् विशेषज्ञ डा. केशवराज भट्टराई, मचा ल्वय् विशेषज्ञ डा. सरिता श्रेष्ठ ताम्राकार, अनमी विमला राजभण्डारी, सहयोगी चमेली गुरुब, सहयोगी कृष्ण महर्जनयात मूपाहांपाखें प्रशंसा पत्र लःल्हानादीगु खः ।

चिकित्सालयया उपाध्यक्ष कुमारदेव मानन्धरं लसकुस यानादीगु ज्याझ्वलय् अध्यक्ष डा. श्रेष्ठं चिकित्सालयया थीथी गतिविधि बारे जानकारी याकादीगु खः । उगु इलय् चिकित्सालययात न्यागू लाखनिसें छगू लाख आर्थिक ग्वाहालि यानादीपिं उपाध्यक्ष कुमारदेव मानन्धर, सूर्यमान सिंह बनिया, प्राणदेवी बनिया, अमृतराज शाक्ययात दोसल्लां न्ययेकाः हंगु खः ।

ज्याझ्वलय् चिकित्सालयया आजीवन सदस्य श्यामबहादुर गुरुङ, ठमेल पर्यटन बोर्डया उपाध्यक्ष गीता गुरुङ आजीवन सदस्य मोनिका स्थापित व साधारण सदस्य रमेश श्रेष्ठं चिकित्सालयया निंतिं आर्थिक ग्वाहालि लःल्हानादीगु खः ।