उपमेयर डंगोलया बेलायत भ्रमण, येँया शहरीकरण, जात्रा, आर्थिक विकास बारे अन्तक्र्रिया
येँ (नेपालभाषा टाइम्स)- येँ महानगरपालिकाया उपमेयर मय्जु सुनिता डंगोल छवाःया नितिं बेलायत झायाः थीथी संघसंस्था व समुदाय लिसें अन्तरक्रिया यानादीगु दु । इंग्ल्याण्डया उत्तरपश्चिम स्थित म्यान्चेष्टर शहरय् जूगु ‘वुमन अफ् द वल्र्ड’ (वाउ) अन्तराष्ट्रीय सम्मेलनय् ब्वति कायेत येँ महानगरपालिकाया स्वम्ह मिसा कर्मचारीपिं श्रृष्टि तुलाधर, सिर्जु प्रधान तुलाधर व कुमारी राई लिसें वय्कः बेलायत झाःगु खः ।
वंगु मे महिनाया २४ निसें २६ तक स्वन्हुयंकं जूगु थुगु सम्मेलय् हलिंन्यंकया थीथी ख्यलं प्रभावकारी मिसा व्यक्तित्वपिंत लसकुस यायेगु झ्वलय् राजनीति पाखें निम्हेसिगु नां दुथ्याःगु खः, गुकि अष्ट्रेलियाया न्हापांम्ह मिसा प्रधानमन्त्री मय्जु जुलिया गिलार्ड व उपमेयर डंगोल लाःगु खः । सम्मेलनय् वय्कलं मिसा सशक्तिकरणय् बः बीगु कथं थीथी कार्यशालाय् नेपाःया प्रतिनिधित्व यासें महत्वंजाःगु अनुभव इनादिल । थ्व झ्वलय् वय्कलं वइगु सेप्टेम्बरय् येँ महानगरपालिकां ‘वुमन अफ द वल्र्ड’ (वाउ) सम्मलेन ग्वसाः ग्वयेगु घोषणा नं यानादीगु खः ।
बेलायत भ्रमणया झ्वलय् संयुक्त अधिराज्यया निगू शताब्दी पुलांगु संस्था ‘रोयल जियोग्राफिकल सोसाइटी’, मानविकी व समाजशास्त्रया राष्ट्रीय प्रतिष्ठान ‘बृटिश एकदेमि’ व ब्रुनेल विश्वविद्यालयया ग्वसालय् जूगु छगू ज्याझ्वलय् वय्कः विशेष पाहां कथं ब्वति कयादिल । ज्याझ्वलय् वय्कलं येँयाः (ईन्द्र जात्रा) या म्हसिका बिसें थुगु महत्वंजाःगु नखःयात येँ महानगरपालिकां गुकथं राष्ट्रीयकरण व अन्तराष्ट्रीयकरण यानाच्वंगु धयागु बारे ध्वाः थुइकादिल । मे ३१ कुन्हु ‘इण्डिजिनाइजिंग दि हिमालयज्’ नांया थुगु ज्याझ्वलय् वय्कलं वइगु यँयाः पुन्हि जात्राय् ब्वति कायेत सकलसित ब्वनादिल ।
अथेहे मे ३० कुन्हु अक्सफोर्ड विश्वविद्यालयय् ‘दि जेन्ट्रिफिकेशन अफ् काठमाण्डु’ विषयय् जूगु छगू गोष्ठीइ उपमेयर डंगोलं मू कार्यपत्र न्ह्यब्वसें ऐतिहासिक नगर येँया शहरीकरणय् वयाच्वंगु हाथ्यात लिसें अनया सांस्कृतिक व सामाजिक सम्पदायात म्वाकातयेगु आजु कयाः येँ महानगरपालिकाया नेतृत्वय् जुयाच्वंगु थीथी परियोजनाया बारे न्ह्यब्वयादिल । अक्सफर्ड विश्वविद्यालयय् संलग्न थीथी प्राज्ञपिंसं ब्वति कयादीगु उगु गोष्ठीइ प्राध्यापक डेविड गेल्नर व प्राध्यापक दिवाकर आचार्यपिंसं उपमेयर डंगोललिसे प्राज्ञिक अन्तरक्रिया यानादीगु खः ।
अथेहे मे २८ कुन्हु लण्डनया साउथ केन्जिंगटन स्थित नेपाःया राजदूतावासय् जूगु अन्तरक्रिया ज्याझ्वलय् उपमेयर डंगोलं येँ महानगरपालिकां न्ह्याकाच्वंगु थीथी आर्थिक, औद्योगिक, सांस्कृतिक व सामाजिक विकास परियोजनाया बारे प्रस्तुति बियादिल । भ्रमणया झ्वलय् उपमेयर डंगोलं म्यान्चेष्टर, एडिनबरा, अक्सफर्ड, केण्ट व लण्डनया थीथी लागाय् च्वनाच्वंपिं नेपाःमि समुदाय लिसें न थीथी औपचारिक ज्याझ्वलय् ब्वतिकासें अन्तरक्रिया नं यानादीगु खः ।
LEAVE YOUR COMMENTS