नीछगूगु सदीया आधुनिक युगय् मनूतय् अनगिन्ति चाहना, घमण्ड, स्वार्थ, तं आदिया कारणं तनावग्रस्त जुयाच्वंगु इलय् स्वच्छ, स्वस्थ्य जीवन गथे यानाः हनेगु ? थ्व चिन्ताया विषय जुयाच्वंगु दु । तनावया कारणं मनूतय् थीथी ल्वचं कयाः जीवन कष्टकर जुयाच्वंगु दुसा ब्लड प्रेसर अप्वया हर्ट अट्याक, पक्षघात व ब्रेन ह्युमरेज थेंज्याःगु खतरनाक प्राणघाटक ल्वचं कइगु ग्याः चिकु ब्वलनाच्वंगु दु ।

वासलं मथियाः समस्या ब्वलना च्वनीगु जीवनया थज्याःगु अवस्थाय् तनावं मुक्त जुया च्वनेया लागिं ध्यान बरदान तुल्य जुयाच्वंगु हलिमय् पूर्वीय संस्कृति अध्ययनया क्रमय् ब्वने दु । ध्यानं मनूतय् नुगलय् च्वनाच्वंगु मि स्यानाः सिचु ह्वला बी । लः मदयाः गना वनाच्वंगु स्वांमा लः बिइवं तिं स्वाना वइथें तनावंग्रष्ट मनू ध्यानं स्फूर्त जुइ ।

तर ध्यान गथे यानाः च्वनेगु ? थ्व महत्वपूर्ण विषय जुयाच्वंगु दु । पूर्वीय आध्यात्म संस्कृतिइ उल्लेख जुयाच्वं कथं ध्यान मुख्य यानाः हिन्दू, ताव व बुद्ध धर्मय् आधारित जुयाच्वंगु दु । अथेहे यहुदि, क्रिश्चियन व इस्लाम धर्म कथं नं ध्यानय् च्वनेफुगु उल्लेख जुयाच्वंगु दु । तर सत्य खँ न्ह्यागु हे कथं ध्यानय् च्वंसां थुकिया मू उद्देश्य धइगु मनय् शान्ति प्राप्ति हे खः ।

उकिं लँपु पाना च्वंसां मू खँ, ध्यानय् च्वनेगु खः, ध्यानय् पारंगत जुइगु हे खः ।तर ध्यानय् च्वने उलि अःपु मजू । बौद्ध ध्यान केन्द्रय् च्वनाः बुद्ध धर्म प्रति आकर्षित जुयादीम्ह क्यानाडाया राजनीतिज्ञ व बौद्ध धर्म सम्वन्धि च्वमि जोन हर्गनं धयादी कथं ध्यानय् च्वने मसल धाःसा थ्व ईया बरबादी जक जुइ । नापं थुकिं झन् तनाव अप्वया जीवन झन झन कष्टकर जुइ ।

क्यानाडाया राजनीतिज्ञ व बौद्ध धर्म सम्वन्धि च्वमि जोन हर्गनं धयादी कथं ध्यानय् च्वने मसल धाःसा थ्व ईया बरबादी जक जुइ । उकिं ध्यानय् च्वनेत योग्य गुरु व सही गुरुया जरुरी जू ।

उकिं ध्यानय् च्वनेत योग्य गुरु व सही गुरुया जरुरी जू ।बुद्ध धर्म कथं ध्यान छगू कथंया अभ्यास खः गुकिं मनूतय् मन शून्यताय् तयाः स्वच्छ, स्वस्थ्य जीवन हने फइ । मनयात शुन्यताय् तयेगु धयागु चिकित्सकतय् धापू कथं घालय् गथे हानिकारक किटाणुया हमलां घाः स्यानाच्वनी, घाः लनी मखु, तर घालय् हानीकारण किटाणु शुन्य जुल कि घाः लना वनी, अथेहे हानीकारण भावनां हमलां बचे यानाः मनयात खालि याना तयेगु हे ध्यान खः ।

ध्यानं मनूत जागरुक जुयाच्वनी । होशियारी नं जुयाच्वनी । थुकिं मनूतय् एकाग्रता अप्वया उमिगु कार्य क्षमताय् बृद्धि जुइ । उकिं ध्यानय् च्वनीपिं मनूत वा विद्यार्थी जीवनय् ध्यानय् च्वनीपिं मस्त विचलित मजूसे धैर्यवान जुयाच्वनी । छुं न्हि न्ह्यः उत्तरी थाइल्याण्डया तामलुङ गुफाय् दुने १७ न्हु तक फँसे जूपिं मस्त ध्यानय् च्वनाच्वंगु लुइकूगु खः ।

खिउँगु सुनसान गुफाय् दुने नं मस्त भयभित मजुसे स्वस्थ जुयाच्वनेफुगु ध्यानया लिच्वः कथं कयाच्वंगु दु । थ्वहे झ्वलय् जोन हर्गनया धापू लुमंकेबहः जू । वय्कलं धयादीगु दु– ध्यानं मनूतय् ज्यान बचे यायेफु । वय्कलं हानं धयादीगु दु कि ध्यानं सिंचित मनं लडाई थें जाःगु भयावह स्थितिइ तकं साम्य यायेगु सामर्थ दु ।

थ्वहे कारणं वय्कलं धयादीगु दु कि २५०० दँ स्वयां पुलांगु तथागत बुद्धं प्रतिवादन याना बिज्याःगु बुद्ध धर्म व थुकिया प्रयोगात्मक अभ्यास कथं मनयात शान्त यानाः शुद्ध याना तयेगु क्रिया, गुकियात ध्यान धयाच्वन, हलिमय थौंया आधुनिक युगय् नं उलि हे महत्वं जायाच्वंगु दु । बुद्ध धर्म चेतना अभिबृद्धि, ज्ञानया धुकू व आन्तरिक शक्ति प्रदायक जूगु जुयाः नांजाःम्ह मेम्ह बौद्ध विद्वान अमेरिकाया रवर्ट थूरमानं बुद्ध धर्मयात ‘इनर साइन्स’ या संज्ञा बिउगु दु ।

ध्यानया तःधंगु महत्व दुगु जुयाः बैज्ञानिकतय्सं ध्यानया अभ्यास यायेत बः बियाच्वंगु दु । हार्डवर्ड विश्वविद्यालयय् यानास्वःगु अध्ययन कथं ध्यान याइपिं मनूतय्के ध्यान मयाइपिं मनूतय्के स्वयां न्ह्यपुया हिप्पोकयाम्पस धाइगु थासय् दइगु छगू कथंया तत्व गुकियात अम्याइर्गदल धाइ, उकिया मात्रा अप्वः दयाच्वनी ।

थ्व तत्व अप्वः दइपिं मनूतय्के तं म्हो जक जुइ । अथेहे ध्यानय् च्वनीपिं मनूतय्के अल्जाइमर थेंज्याःगु ल्वः जक मनिगु ल्वचं कइमखु । नापं ध्यानं मनूत स्वस्थ जुयाः बुरा बुरीया बैसय् नं ल्याय्म्ह ल्यासे पह वयाच्वनी । ध्यानया थज्याःगु थीथी कथंया महत्वया कारणं हलिमय् ध्यान याइपिनि संख्या न्हापा स्वयां अप्वया वयाच्वंगु दु ।

नापं थीथी कथंया ध्यान केन्द्रत चालाच्वंगु दु । ब्वने दु कथं लिपांगु इलय् हलिमय् थीथी थासय् बौद्ध ध्यान केन्द्र यक्वः हे चालाच्वंगु दु । थुकिं ध्यानया अप्वया वनाच्वंगु महत्वयात थुइकेफु । तर ध्यान ई व परिस्थिति नाप स्वाना च्वनीगु क्रिया जूगु जुयाः थुकिया महत्व नं व हे कथं थथ्याः क्वथ्याः जुयाच्वनी ।

तथागत बुद्धं धयाबिज्याःगु दु कि वसपोलं प्रतिपादन यानाबिज्याःगु बुद्ध धर्मय् अन्त्यपाखे बुद्ध नाप स्वानाच्वंगु छुं नं कृति वा क्रियाकलाप दक्वं लोप जुयावनी । गथे बुद्ध मूर्ति वा चैत्य ध्वस्त जुइ । शीलया आचरण मदया वनी । न्हापांनिसें चले जुया वयाच्वंगु धाःसां बुद्ध धर्मया महत्व मदया न्हनावनी ।

थज्यागु अवस्थाय् ध्यानया अभ्यास नं समाप्त जुइ । अबलय् हलिमय विनासं क्वातुक्क हाः काये धुंकी । स्वःस्वःथाय् ल्वापु, आतंक व युद्ध आदिया कारणं जनजीवन अस्तव्यस्त जुयाच्वनी । मनूत बुद्धिहीन जुया पशु समान जुइ । ज्यानया मूल्य दइ मखु ।तर मैत्री बुद्धया उदय नापं हलिमय् हानं शान्तिया स्वां वा गाइ । न्यने दु कथं मैत्री बुद्धया पालाय् मनूत ध्यान्ती जुइ ।

ध्यान मनूतय् न्हिया न्हिथंया चर्या जुइ । मैत्री बुद्ध स्वयम ध्यानी जुयाबिज्याःगु जुयाः वसपोलया ध्यानया ज्योतिर्मय प्रभाव अले मैत्री, करुणाया निरन्तर प्रभावया कारणं हलिमय् सुख, समृद्धिं भय बियाच्वनी । ध्यान सिंचित स्वच्छ मनया कारणं मनूत स्वत्त स्फूर्त जुयाः शान्त जुयाच्वनी । आन्तरिक जागरणया कारणं मनूत विद्वान जुयाः प्रज्ञावान, धैर्यवान व ज्ञानी जुयाच्वनी ।

उमिगु निःस्वार्थी मन परोपकारी भावना व सेवाया कारणं समाजय् थवं थवय् मित्रता क्वातुया च्वनी । गुकिं समाज धिसि लानाच्वनी । ल्वापु ख्यापुया न्ह्यसः तकं दनीमखु । शुद्ध मन, स्वच्छ जीवनया लिच्वः कथं कुशल मंगल जुयाः मनूतय् आयु ताहा जुयाच्वनी । धात्थें ला अबलय् विश्व हे स्वर्ग समान जुयाच्वनी ।

न्यने दु कथं मैत्री बुद्ध गुम्हेसित ध्यानी बुद्ध धकाः नं धायेगु यानाच्वंगु दु, आः नं तुषिता भुवनय् ध्यानया आसनय् बिज्याना च्वंगु दु । झीपिं नं ध्यानया महत्वयात थुइका ध्यानय् च्वनाः स्वस्थ जीवन हने सयेके । थ्वहे आधुनिक युगय् स्वस्थ जुयाच्वनेगु उत्तम उपाय खः । भवतु सत्व मंगलम ।

 

सम्बन्धित बुखँ

LEAVE YOUR COMMENTS