थ्व केवल सम्मेलनया लागिं सम्मेलन मखु

सम्मेलनया तयारी गुकथं न्ह्यानाच्वंगु दु ?
तयारी तीव्र रुपं न्ह्यानाच्वंगु दु । जि अमेरिकाय् च्वनाः नं तयारी बारे जानकारी कयाच्वनागु खः । नेपालय् सकस्यां जोडतोडं ज्या यानाच्वनादीगु दु । ग्वसाः खलः बाहेक मेमेगु खलः पुचः व व्यक्तिपिंपाखें नं ग्वाहालि यानाच्वंगुलिं तयारी बांलाः ।
सम्मेलन बारे नेवाःतय् दथुइ गज्याःगु उत्साह वयाच्वंगु खंकादिया ? विश्वन्यंकं हे उत्साह वयाच्वंगु दु । जितः न्हिंन्हिं हे थीथी देशय् च्वंपिं नेवाः पासापिंसं फोन यानाः न्यनेकने यानाच्वंगु दु । झीगु संगठन मदुगु थासय् च्वंपिंसं तक स्वापू तयाः नेवाः दिवस गय् यानाः हने फइ धकाः न्यनाच्वंगु दु । गुलिं थासय् वकुन्हु जिमिसं जा मनसे समय्बजि नयाः नेवाः दिवस हनेत्यना धकाः नं खबर यानाच्वंगु दु । अमेरिकाया छुं छुं थासय् वकुन्हु हे इसाईतय् तःधंगु नखः इस्टर नं लानाच्वंगुलिं तःधंगु याये मखु, तर दिवस हनेगु ज्या चाहिं याये धकाः खबर याना हःगु दु ।

नेपालय् चाहिं गज्याःगु उत्साह वयाच्वंगु खंकादिया ?
नेपालय् नं तःधंगु उत्साह दु । नेपालय् झन् विश्वया मेमेगु देशय् स्वयां यक्व खलः पुचःत दु । जिं न्यना कथं नेपालय् न्हय्सःगू धइथें खलः पुचः दु । उकी मध्ये छुं संस्थातय्सं थःपिंसं हे ग्वाहालि यायेगु बचं बियादीगु दुसा गुलिं व्यक्तिगत रुपं नं ग्वाहालि याः वयाच्वंगु दु । गथे कि थ्वहे सम्मेलनयात ताः तयाः नेपालभाषा एकेदमिं स्वन्हुयंकं सफू ब्वज्या यायेत्यंगु दु । झीसं ग्वाहालिया लागिं नेवाः देय् दबू लिसें थीथी नेवाः न्ह्यलुवापिंत नं स्वापू तयाच्वनागु दु । वय्कःपिंसं सकसियां ग्वाहालिं झीगु ज्याझ्वः सफल जुइगु निश्चित हे जूगु दु ।

सम्मेलन सिधयेधुंकाः तुरुन्त हे कार्यान्वयनय् वनेगु छु ज्या जुइ ?
सम्मेलनय् झिंच्यागू कार्यपत्र न्ह्यब्वइगु ग्वसाः दु । उकी नं वास्तवय् आः झीसं तुरुन्त गय् यानाः न्ह्याः वनेगु धइगु प्रस्तावत वयाच्वंगु दु । उकियात नं झीसं लागू यायेगु जुइ । सम्मेलन सिधयेधुंकाः झी नेवाः बुद्धिजीवी व न्ह्यलुवातलिसे अन्तक्र्रिया यानाः आः छु पलाः छीगु धकाः सहलह यायेगु ग्वसाः दु । थ्व सम्मेलनयात मेमेगु भेला गोष्ठी थें केवल छगू सम्मेलन जक यानाः क्वचायेकेगु ज्या जुइ मखु । छाय्धाःसां थ्व स्वयां न्ह्यः वल्र्ड नेवाः अर्गनाइजेशनपाखें क्यानाडाय् नर्थ अमेरिकन नेवाः रिजनल कन्फरेन्स याःगु खः । उगु सम्मेलन सिधयेकाः नेवाः नसात्वँसाया बारे अध्ययन यायेगु, नेवाः संस्कृतिया बारे अध्ययन यायेगु, नेवाः गुर्जुपिनि विकासया लागिं परियोजना न्ह्याकेगु थेंज्याःगु ज्याखँत न्ह्याःगु खः । आः नं अज्याःगु हे उपलब्धी ज्या जुइगु खँय् जिपिं ढुक्क जुयागु दु ।

थ्व सम्मेलनय् गज्याःगु मूति पिकायेगु छिकपिनि आज्जु खः ?
स्वयादिसँ, दकलय् न्हापां ला थ्व सम्मेलनं विश्वन्यंकंया नेवाःतय्त छथाय् तयेगु ज्या याइ । नेवाः विभाजित धाइ, थवंथः मिले मजू धाइ । तर झी धाथें अथे मिले मजूपिं मखु, झी दथुइ एकताया भावना नं दु धकाः क्यनेगु ज्या थ्व सम्मेलनं याइ । झीसं बीगु छगू तःधंगु सन्देश थ्वहे नं जुइ ।

थ्व धुंकाः मेगु सम्मेलन गन जुइ ?
ख ला थ्व धुंकाः झीसं दँय्दसं हे थज्याःगु सम्मेलन याना वने माःगु खः । तर याये फइ, फइ मखु आः धाये फुगु स्थिति मदु । अय्नं दँय्दसं थज्याःगु सम्मेलन मयाःसां दँय्दसं हलिं नेवाः न्हि अर्थात् विश्व नेवाः दिवस हनेगु ज्या धाःसा अवश्य जुइ । दँय्दसं नेवाः दिवस हने फयेमा धकाः हे झीसं नेवाःतय् नखःचखः मलाइगु ई कथं मार्चया अन्तिम शनिवाःयात ल्ययागु खः । आः आकिवं ला डब्लुएनओया तःमुँज्या नं यायेमाःगु दु । यदि पासापिं सहमत जुल धाःसा आकिवंया नेवाः सम्मेलन नेपालय् हे यायेगु ज्या नं जुइफु ।

नेवाःत थवंथः मुनेगु, च्वनेगु ज्या ला मेमेगु इलय् नं मजूगु मखु, थ्व मुना व मेमेगु मुना छुकी पाः ?
नखःचखः, न्हूदँया भिंतुना आदि इलय् नं नेवाःत मुनाच्वंगु दु । तर विशुद्ध नेवाः ‘कज’ या लागिं हे मुनेगु ज्या धइगु नेवाः दिवस कुन्हु हे जुइ धइगु जिमिगु आशा दु । उकिया लागिं हे जिमिसं आह्वान नं यानाच्वनागु दु ।

गज्याःगु आह्वान ?
ख ला जिं उकुन्हु छगू भिडियो मेसेज नं छ्वयागु दु । झीगु आह्वान छु धायेबलय् झीपिं न्ह्याथाय् च्वंसां नेवाः हे जुयाः च्वनेगु खः । झीगु सभ्यता धइगु तसकं तःधंगु व लोकंह्वाःगु सभ्यता खः । दँय् छक्वः जक जूसां झीसं झीगु थ्व सभ्यताया चर्चा याये, थ्वयात राज्यं गय् यानाः दमन यानाच्वन धकाः खँल्हाबल्हा याये अले उकिया समाधान छु जुइ धकाः चर्चा याये । नेवाः दिवस हनी कुन्हु यदि सुं गनं सशरीर उपस्थित जुइ मफुसा थवंथः मुनाः च्वय् धया थें नेवाःतय् चर्चा यानादिसँ, वकुन्हु नेवाः नसात्वँसा नयेगु यानादिसँ, नेवाः पसः पुनेगु, नेवाः म्येँ न्यनेगु यानादिसँ । छिकपिं गन गन च्वनादियागु खः अन अनयागु हे भासं नेवाः जुयाया गौरव अथवा नेवाःया सभ्यता, नसात्वँसा, वसः, भाषा, लिपि, संस्कृति आदि बारे च्वयाः वा फोटो तयाः सामाजिक सञ्जालय् पोष्ट यानादिसँ धकाः आह्वान यानागु दु ।

थ्व नेवाः सम्मेलनया झ्वलय् सकल नेवाःतय्त छु इनाप यानादी ?
च्वय् धयाथें हे सकसितं इनाप यायेमास्ते वः । झी नेवाः गुलि तःजि व सम्पन्न जाति खः धइगु खँ झी सकस्यां सिउ । थुकियात विश्वया फुक्क हे जनतां सीके फयेमा, विश्वया फुक्क हे थासय् थुकिया प्रचार प्रसार जुया वनेमा धकाः झीसं थ्व अभियान न्ह्याकेत्यनागु खः । उकी सकलें सक्रिय रुपं सहभागी जुयादिसँ, मथूपिंत थुइका बियादिसँ, दुनुगलंनिसें थ्वहे इनाप याये मास्ते वः ।

सिजन श्रेष्ठ