ने. सं. ११४३ तछलाथ्व त्रयोदशी -

दछिया दुने लुँ तोलां ३४,५०० थहां वन

येँ (नेपालभाषा टाइम्स) – लुँया भावं म्हिगः नं न्हूगु कीर्तिमान कायम यात । म्हिगः लुँ छतोलाया ९७ हजार ५०० थ्यनसा वह तोलाया १२१० थ्यन । नेपालय् दछिया दुने लुँया भावय् ३२ हजार ५०० तका थहां वन । थ्व नं छगू कीर्तिमान हे जूगु दु ।

थगुने साउन १२ गते छापावाल लुँया भाः तोलाया ६५ हजार व तेजाबी लुँ तोलाया ६४ हजार ७०० तका थ्यनाच्वंगु खः । थुगुसी साउन १२ गते तक थ्यंबलय् छापावाल लुँया भाः ९७ हजार५०० व तेजाबी लुँया भाः तोलाया ९७ हजार ६० तका थ्यंगु दु। अथेहे वहया भाः नं दछिया दुने तोलां ४३५ तका थहां वनाः म्हिगः १२१० तका थ्यंगु दु ।

नेपालय् लुँया भाः थहां वंगु थ्व आःतकया उच्च विन्दू खः । अन्तर्राष्ट्रिय बजारय् हे लुँया भाः थहां वनाच्वंगुलिं नेपालय् नं लुँया भाः अत्यधिक मात्रां थहां वनाच्वंगु खः । अन्तर्राष्ट्रिय बजारय् म्हिगः लुँया भाः प्रतिऔंस १९४२.२० डलर थ्यंगु खः । अन्तर्राष्ट्रिय बजारय् थ्व भाः २ हजार तक थ्यनीगु अनुमान जुयाच्वंगु दु ।

थ्व ल्याखं याकनं हे लुँया भाः तोलां छगू लाख पार याइगु अवस्था वःगु दु। नेपाल सुनचाँदी व्यवसायी महासंघया अध्यक्ष मोहनकुमार सुनारं लगानीकर्तातय्सं लुँयात हे दकलय् सुरक्षित लगानी यायेगु थाय् कथं तायेकातःगुलिं यानाः नं अन्तर्राष्ट्रिय रुपं हे लुँया भाः थहां वनाच्वंगु खः ।

कोरोना भाइरसया संक्रमणया कारणं विश्वन्यंकं हे अर्थतन्त्र स्यनाच्वंगुलिं लगानीकर्तात लुँइ आकर्षित जुयाच्वंगु कारणं यानाः भाः थहां वनाच्वंगु खः ।