ने. सं. ११४४ कौलाथ्व चौथी -

तोखायात पर्यटकीय गन्तव्यया रुपय् विकास यायेत जोड

येँ – येँया उत्तरी भेगय् लाःगु सांस्कृतिक महत्वं जाःगु तोखा देय्यात पर्यटकीय गन्तव्यया रुपय् विकास यायेमात सरोकारवालातय्सं बः बिउगु दु । ऐतिहासिक, सांस्कृतिक, धार्मिक व पुरातात्विक ल्याखं महत्वं जाःगु तोखायात प्रमुख पर्यटकीय गन्तव्यया रुपय् विकास यायेत मन्त्री, संस्कृतिविद् व स्थानीय जनप्रतिनिधिय्सं नं उकथं बः बिउगु खः ।

तोखा संस्कृति सम्पदा संरक्षण मंचं ग्वसाः ग्वःगु ज्याझ्वलय् सरोकारवालातय्सं तोखाया विकासया निंतिं सकलें छप्पँ जुइमाःगु आवश्यकतायात बः बिउगु खः ।

मंचया ग्वसालय् जूगु संस्कृतिविद नापं वाङ्मय शताब्दी पुरुषया अभिनन्द व सांस्कृतिक संरक्षित क्षेत्र तोखाया विकासया निंतिं कार्ययोजनापत्र सार्वजनिक ज्याझ्वलय् मूपाहांकथं झायादीम्ह उपप्रधानलिसं रक्षामन्त्री ईश्वर पोखरेलं निर्वाचनया इलय् राजनीतिक खँ ल्हानाः सकलें पार्टीगत रुपं उखेथुखे जूसां समग्र तोखाया विकासया निंतिं सकलें छगू हे थासय् दनेमाः धयादिल ।

ज्याझ्वलय् अभिनन्दित व्यक्तित्व शताब्दी पुरुष सत्यमोहन जोशीं तोखा देय् संस्कृतिया संरक्षण यासें पर्यटनया विकास यायेगु निंतिं छगू बांलाःगु थाय् जूगु धयादिल । वय्कलं स्वनिगःया सांस्कृतिक सम्पदाया विकासय् तोखां महत्वपूर्ण भूमिका म्हिताच्वंगु नं धयादिल ।

तोखा नगरपालिकाया प्रमुख प्रकाश अधिकारीं नगरपालिकां तोखाया समग्र विकासया निंतिं थीथीकथंया योजना दयेकाः न्ह्याः वनच्वंगु धासें नगरपालिकां सार्वजनिक याःगु नीति तथा कार्यक्रमय् नं तोखायात सांस्कृतिक संरक्षण क्षेत्र घोषणा यानागु जानकारी बियादिल ।

मंचया नायः मणिराज डंगोलया सभापतित्वय् जूगु ज्याझ्वलय् पुरातत्व विभागया महानिर्देशक भेषनारायण दाहाल, तोखा नगरपालिका वडा नं. २ या वडाअध्यक्ष दीपकराज जोशी, समाजसेवी हिराकाजी महर्जन लगायतं तोखाया विकासया निंतिं थीथी पक्षयात कयाः नुगःखँ तयादीगु खः ।