सीएमसी हे वःसा मेलम्ची याकनं

येँ –  सरकारं मेलम्ची खानेपानी आयोजना दयेकेत बिसिउँ वंगु इटालियन ठेकेदार सीएसीयात हे लित हयेत कुतः जुयाच्वंगु खँ खानेपानी मन्त्री बिना मगरं कनादीगु दु । म्हिगः संसदया अर्थ समितिइ न्ववासें मन्त्री मगरं सीएमसी लिहां वःसा सरकार मेगु विकल्पय् मवनेगु खँ कनादीगु खः ।

वय्कलं सीएमसी लिहां वःसा नेपाःयात फाइदा जुइगु खँ कँसें आः थथें न्हूम्ह ठेकेदार मालेगु विकल्पय् मवनेगु बिचाः नं प्वंकादिल ।
मेलम्चीया ९६ प्रतिशत ज्या क्वचायेधुंकूगु व ल्यं दनिगु ज्या यायेत ३ अर्ब तका खर्च जुइगु मन्त्रालयया अनुमान दु । खानेपानी मन्त्रालयया सहसचिव तेजराज भट्टं मेलम्चीया बँय् ढलान, भेन्टिलेसन साफ्टा दयेकेगु, गेट दयेकेगु, हेड वक्र्स व फिनिसिङ सहित न्हय्गू ज्या जक ल्यं दनिगु खँ कनादिल ।

थ्व ज्या म्हो इलय् क्वचायेकेगु उपाय् मालाच्वनागु जानकारी नं वय्कलं बियादिल । मेलम्ची खानेपानी विकास समितिया कार्यकारी निर्देशक सूर्यराज कँडेलं सीएमसी ज्याय् लिहां वल धाःसा लागत व ई म्हो जुइगु खँ कनादिल । वय््कलं सीएमसीं नियमित ज्या याःसा आयोजना निलाया दुने क्वचाइगु खँ कँसें आः ल्यं दनिगु ज्याया निंतिं विदेशी ठेकेदार मालाच्वनेमाःगु आवश्यकता मदु धयादिल ।

मेलम्ची आयोजनाय् ज्या यानाच्वंपिं नेपाःमि ठेकदार बारे न्यंगु छगू न्ह्यसःया लिसः बिसें मन्त्री मगरं कानून कथं नेपाःमि ठेकेदारया सरकारं भुक्तानी बीमाःगु बाध्यता मदुगु खँ नं कनादिल । मन्त्री मगरं धयादी, ‘छगू विदेशी कम्पनीं ठगे यानाः वंगु दु, थुकिं जिमित चिन्ता दु, तर कानूनतः मन्त्रालयं उगु ध्यबा पुलेमाःगु प्रारुप मदु, तर थ्व विषयसं सहलह यानाः निष्कर्ष पिकाये जुइ ।’

सम्बन्धित बुखँ

LEAVE YOUR COMMENTS