ने. सं. ११४३ चौलाथ्व तृतीया -

नेपाल संवत् व्यावहारिक छ्यलाबुलायात कयाः सहलह मुँज्या जुइगु

येँ- नेपाल संवत् न्हूदँ राष्ट्रिय समारोह समिति–११४१या ग्वसालय् वइगु आइतवाः छगू सहलह मुँज्या याइगु जूगु दु । समितिं नेपाल संवत्यात व्यावहारिक रुपं छ्यलाबुलाय् हयेगु ल्याखं उगु मुँज्या यायेगु त्यंगु खः ।

समितिं थुगुसी न्हूदँया लसताय् दछियंकं थीथी गतिविधि यायेगु धकाः क्वःछिउकथं वइगु आइतवाः जूम अनलाइनया माध्यमं सनिलया खुताः इलय् उगु मुँज्या यायेत्यंगु खः ।

नेवाः न्ह्यलुवा मल्ल के. सुन्दरया विशेष उपस्थितिइ जुइगु मुँज्या विशेष यानाः नेपाःया मौलिक संवत् नेपाल संवत्यात व्यावहारिक रुपं छ्यलाबुलाय् हयेगु निंतिं छु गुकथं पहल याये फइगु धइगु खँय् केन्द्रीत जुइगु समितिं धाःगु दु । सहलह मुँज्याय् नेपाल संवत्या विषयय् अध्ययन, अनुसन्धान यानाच्वंपिं विज्ञ व्यक्तित्वया नं सहभागिता दइ ।

नेपालय् च्वंपिं नेवाःतय्सं चन्द्रमासकथं नेपाल संवत् छ्यलेगु याना वयाच्वंगु जक मखसे नेवाःतय्सं हनेगु याना वयाच्वंगु नखःचखः, जात्रा, पर्व तकं चन्द्रमासया लिधंसाय् हे हना वयाच्वंगु दु । मेखे अमेरिकाय् च्वनाच्वंपिं नेवाःतय्सं सौर्यमास कथं नं नेपाल संवत्यात व्यावहारिक रुपं छ्यलाबुलाय् हये जिउ खँय् अध्ययन यानाच्वंगु जानकारी प्राप्त जूगु दु ।

आतक चन्द्रमासकथं जक नेपाल संवत्या छ्यलाबुला जुया वयाच्वंगुलिइ आः वयाः सौर्यमासकथं नं थुकियात छ्यले जिउ धइगु खँ पिहां वःगुलिं थ्व हे विषयय् सहलह मुँज्या केन्द्रीत जुइगु न्हूदँ समारोह समितिं जानकारी बिउगु दु ।