ढुवानी दिकेवं बजारय् पेट्राेलया अभाव

येँ – ट्यांकर व्यवसायी व चालकतय्सं इन्धन ढुवानी दिका बिउगु छन्हुं हे स्वनिगलय् चिकंया अभाव खनेदुगु दु । स्वनिगःया थाय्थासय् च्वंगु पम्पय् म्हिगःनिसें हे चिकं कायेत लाइन च्वनाच्वंगु खने दयेधुंकूगु दु ।

भारतय् चिकं काःवंगु नेपाःया ट्यांकरया चालकयात भारतीय प्रहरी दाःगु धासें थुकिया विरोधय् नेपाली ट्यांकर व्यवसायी व चालकतय्सं चिकं ढुवानी दिका बिउगु खः । वीरगञ्जं चिकं दुत हइपिं ट्यांकर चालकतय् सुरक्षाया माग यानाः आइतवाः निसें चिकं ढुवानी दिकूगु खः । उमिसं भारतं चिकं हयेगु जक मखु येँय् चिकं यंकेगु व नेपाल आयल निगमया थानकोट व अमलेखगञ्ज डिपोय् चिकं लोड अनलोडया ज्या तकं दिका बिउगु खः ।

वंगु शनिवाः चिकं काःवंपिं न्हय्म्ह नेपाःमि ट्यांकर चालकयात भारतीय प्रहरीं दाःगु खँ धाःगु दु । नेपाल पेट्रोलियम ढुवानी व्यवसायी महासंघया उपाध्यक्ष सुरेन्द्र श्रीवास्तवं वीरगञ्ज सुख्खा बन्दरगाहय् नेपाली चालकतय्त दाःगु खँ धाःगु दु । उपाध्यक्ष श्रीवास्तवं वंगु न्यान्हु खुन्हु न्ह्यवंनिसें भारतीय पक्षं नेपाली चालकतय्त दायेगु याना हयाच्वंगु खँ धाःगु दु ।
थौंकन्हय् भारतय् चिकं थिके जूगुलिं नेपाः वइगु चिकं उखे हे तस्करी जुइगु नं अप्वयाच्वंगु दु ।