विश्वकप पुलुपालु

कालोसूचीइ कप्तान

विश्वकप फुटबल जक मखु छुं नं कासाय् प्रतिबन्धित वासः प्रयोग याये मजिउ धइगु सकसिनं सिउगु हे खँ खः । अझ लागू वासः प्रयोगया खँ ला तसकं तापाःगु खँ खः । थज्याःगु अवस्थाय् यदि लागू वासःया तस्कर हे विश्वकप फुटबल म्हिताच्वंगु दु धाल धाःसा उकियात छु यायेगु ? छु धायेगु ? जारी विश्वकप फुटबलय् साविकया विजेता जर्मनीयात मेक्सिको १–० गोलं बुकूगु सुयां ल्वःमंगु खइमखु ।

थ्व हे मेक्सिको टीमया कप्तान राफेल माक्र्वेजयात धाःसा लागू वासःया तस्करया धलखय् दुथ्याकातःगु दु ।मेक्सिकोया जःलाखःला देय् अमेरिकां माक्र्वेजयात कालोसुचीया धलखय् तःगु खः । लागू वासःया कारोबारीयात ग्वाहालि याःगु द्वपनय् अमेरिकाया ‘ट्रिजरी डिपार्टमेन्टं माक्र्वेजयात वंगु अगस्ट महिनाय् जक कालोसूचीइ तःगु खः ।

३९ दँ दयेधुंकूम्ह माक्र्वेज मेक्सिकोया कप्तान जक मखसे न्याक्वःतक विश्वकप म्हितूम्ह कासामि नं खःसा वनापं गुगुं नं अमेरिकी बैंक, वित्तीय संस्था, कम्पनी वा व्यक्तिगत रुपं कारोबार मयायेत व वनापं स्वापू दुगु सम्पत्ति तकं रोक्का यानातःगु दु । माक्र्वेजं थःत बियातःगु आरोपया खण्डन याना वयाच्वंगु दु ।

समर्थकयात ५ दँया प्रतिबन्ध

कासाय् अवाञ्छित ज्या यात धाःसा कासामियात प्रतिबन्ध तइगु सामान्य खः । प्रतिबन्ध निश्चित अवधि व ईया निंतिं तइ । तर सुं समर्थकयात उकथं प्रतिबन्ध तःगु धाःसा आतक न्यने लंगु मदुनि ।

रुसय् जारी विश्वकपया झ्वलय् धाःसा इंग्ल्याण्डया छम्ह फुटबल समर्थकयात प्रतिबन्ध तया बिउगु दु, व नं न्यादँया निंतिं । अझ अजू चायापुगु खँ छु धाःसा उम्ह समर्थकयात विश्वकप जक मखसे दक्वंकथंया फुटबलपाखें न्यादँया निंतिं प्रतिबन्ध तःगु खः ।

इंग्ल्याण्डया डर्बी सहरया ५७ दँ दुम्ह माइकल होबर्टयात विश्वकपया इलय् यहुदी विरोधी म्येँ हालाः नाजी शैलीं सलाम याःगु द्वपनय् उकथंया प्रतिबन्ध तःगु खः ।

वंगु सोमवाः इंग्ल्याण्ड व ट्युनिसिया दथुइ जूगु कासाया इलय् रुसया भोल्ग्रोगाड सहरया छगू बारय् फुटबल स्वयाच्वंगु इलय् होबर्टं नाजी शैलीं सलाम याःगु भिडियो इंग्ल्याण्डया हे समर्थकतय्पाखें अनलाइनय् भाइरल जूगु खः ।उकिया हे आधारय् लेस्टरया म्याजिस्टे«ट कोर्टं होबर्डयात सकतांकथंया फुटबलपाखें न्यादँया निंतिं प्रतिबन्ध तःगु खः ।

विवादास्पद विज्ञापन

विश्वकप फुटबलयात लक्षित यानाः दयेकूगु छगू विज्ञापन विवादय् लाःगु दु । ‘बर्गर किंग’ कम्पनीं रुसय् न्ह्यानाच्वंगु विश्वकपयात लक्षित यानाः दयेकूगु छगू विज्ञापन विवादित जूवंगु खः ।

कम्पनीं दयेकूगु विज्ञापनय् रुसया मिसातय्त विश्वकप फुटबलया झ्वलय् कासामिया मस्तय् मां जुल धाःसा जीवंकाःछि निःशुल्क नकेगु व दां सिरपाः बीगु धकाः विज्ञापन याःगु जुयाच्वन ।

अमेरिकी फास्टफुड चेनं रुसी सामाजिक संजाल ‘भिके’ मार्फत सार्वजनिक याःगु विज्ञापनय् ४७ हजार अमेरिकी डलर पुरस्कार व जीवंकाःछि बर्गर किंगया नसाज्वलं सितिकं नकेगु खँ न्ह्यथनातःगु खः ।

विज्ञापनय् धयातःगु दु, ‘इपिं मिसापिं गुम्हेसिनं अन्तर्राष्ट्रिय फुटबल कासामिपाखें प्वाथय् दइ, इमित सिरपाः बीगु जुइ’ थुकथंया सन्देश दुगु विज्ञापन विवादित जुइवं कम्पनीं माफी नं फ्वने धुंकूगु दु ।