नवदुर्गा द्यःगणयात जात्रा चले यायेत हे समस्या

ख्वप- ख्वप जिल्ला जक मखु देय्न्यंकं हे नांजाःगु नवदुर्गा प्याखं धमाधम संकटय् लालां वनाच्वंगु खँ उगु प्याखनय् सहभागी प्याखंम्वःतय्सं धाःगु दु ।
जात्राया लागिं क्वातुगु श्रोत मदुगु जुयाः प्याखं म्हितीपिं प्याखंम्वः व मेपिं सहभागीत थःथःपिंसं हे छेँनं बजि व ध्यबा हयाः भ्वय् नये मालाच्वंगु दु । जात्रा चले यायेत श्रोत चूलाकेत थ्व जात्राय् द्यः जुइ माःपिं वनमालाततय्सं लँय् च्वनाः छतका नितका चन्दा फ्वने मालाच्वंगु खँ धाःगु दु ।
अथे हे जात्रायात माःम्ह बलि नं न्हापा थीथी मनूतय्सं वयाः चूलाका बीगु खःसां थौंकन्हय् अथे याइपिं मदुगुलिं थुकिया लागिं नं चन्दा हे म्हये माःगु अवस्था वयाच्वंगु दु ।
न्हापा न्हापा पिने जात्रा चले याः वनेबलय् मनूतय्सं द्यःगणयात सम्मान यानाः छेँय् हे थाय् बीगु खः । थौंकन्हय् अज्याःगु सत्कार नं मदुगु जुयाः द्यःगणपिं पिने फल्चाय् द्यनाः प्याखं क्यने माःगु अवस्था वयाच्वंगु दु ।
अथे हे प्याखनय् सहभागी न्हूपिं द्यःगणपिं आखः ब्वं वनेमाःपिं खःसा उपिं स्कूल वनेगु त्वःताः तकं जात्राय् सहभागी जुइ मालाच्वंगु दु । मस्तय्त आखः त्वःतकाः जात्राय् छ्वया हयेत अभिभावकपिं तयार मजुया वइगु स्थिति नं ब्वलनाच्वंगु दु । जात्राय् वनेबलय् द्यःयात धकाः अय्लाःथ्वँ त्वंके हइगु व लिपा द्यः मखुगु इलय् तकं अय्लाः त्वनेगु बानी जुयाः
द्यःगणपिं कुलतय् लानाच्वंगु गुनासो नं वयाच्वंगु दु । थुकिं यानाः द्यःगणया सन्तान सामाजिक रुपं लिउने लाः वनाच्वंगु महसुस याना हयाच्वंगु दु ।
थ्व प्याखनय् ब्वति काये माःपिं वनमाला जातिया मनूतय् पुस्तौनी पेशा धइगु स्वां मीगु खः । तर थौंकन्हय् बुँ मदया वंगुलिं थ्व पेशापाखें विस्थापित जुइ मालाः उमिगु आर्थिक अवस्थाय् तकं लिच्वः लानाच्वंगु दु ।
द्यःगण व जात्रायात छुं समस्या वःसा न्हापा दरवारय् निवेदन यात धाःसा छुं भचा जूसां ग्वाहालि जुयाच्वंगु खःसां गणतन्त्र वयेधुंकाः अज्याःगु ग्वाहालि नं बन्द जूगु गुनासो वयाच्वंगु दु ।