सातोआकी स्मृति दिवसय् किपा च्वज्या कासा
यल (नेपालभाषा टाइम्स)÷ नेपाःया घोप्टेभीरय् जूगु विमान दुर्घटना लानाः मदुम्ह जापानी नागरिक सातोआकी इटोया ३० क्वःगु स्मृति दिवसया झ्वलय् विद्यालयस्तरीय किपा च्वज्या कासा जुल । विमान दुर्घटनाय् लानाः मदुम्ह सातोआकीया लुमन्तिइ थनया क्वपुंद्वलय् वया मांअबुं दयेका बिउगु सातोआकी स्मृति भवनय् उगु किपा च्वज्या कासा जूगु खः ।
प्रतिभा समाजया ग्वसालय् जूगु किपा च्वज्या कासाय् ३६ गू ब्वनेकुथिया पीम्ह स्वयां अप्वः ब्वँमिपिंसं ब्वति काःगु खः । सिनियर व जुनियर यानाः निगू पुचलय् जूगु किपा च्वज्या कासाय् सिनियरपाखे नोरिन श्रेष्ठ न्हाप, पालिजा महर्जन लिउ, जेनिसा वज्राचार्य लियांलिउ व प्रजना श्रेष्ठं हःपाः सिरपाः त्याकादीगु खः । अथे हे जुनियरपाखे जूगु कासाय् उत्सव चौधरी, श्रीजल अधिकारी, आर्शिया देसार व मैत्री शाक्यं छसिकथं न्हाप, लिउ, लियांलिउ व हःपाः सिरपाः त्याकादीगु खः ।
किपा च्वज्या कासाय् सितु मास्के, राजकुमार महर्जन व बालकिशोर चौधरी निर्णायकमण्डलय् च्वनादीगु खः । योङ्ग पिकासोया प्राविधिक ग्वाहालि उगु कासा जूगु खः । ज्याझ्वलय् प्रतिभा समाजया नायः प्रा. डा. वज्रराज शाक्य, सचिव किरणनरसिंह शाक्य, दुजः शाक्य सुरेन, स्मृति भवनया प्रबन्धक शोभा महर्जन वज्राचार्य, समाजसेवी सुशीला शाक्य, झंकरप्रसाद जोशी, कृष्णकुमार श्रेष्ठ, अजयप्रसाद राय चौधरी लगायतया उपस्थिति दुगु खः ।
LEAVE YOUR COMMENTS