न्यालाया दुने निगू लाख संक्रमित थपे जुइगु अनुमान
येँ – स्वास्थ्य तथा जनसंख्या मन्त्रालयं आः वइगु न्यालाया दुने नेपालय् थ्यंमथ्यं निगू लाख कोरोना संक्रमित थपे जुइगु अनुमान याःगु दु । म्हिगः प्रतिनिधिसभाया स्वास्थ्य तथा शिक्षा समितिइ स्वास्थ्य मन्त्रालय अन्तर्गतया नीति, योजना व अनुगमन महाशाखाया प्रमुख डा. गुणराज लोहनीं उगु तथ्यांक न्ह्यब्वयादीगु खः ।
स्वास्थ्य मन्त्रालयया प्रक्षेपण कथं आः वइगु मंसिर महिना तक १ लाख ९३ हजार ८७६ म्ह संक्रमित थपे जुइगु सम्भावना दु । संक्रमित जूपिं ३८ हजार ७७१
म्हेसित वासः यायेमाली व उकी मध्ये नं ९ हजार ६९३ म्हेसित सघन उपचार आवश्यक जुइगु खँ धाःगु दु ।
महाशाखां याःगु प्रक्षेपण कथं साउन महिनाय् ५३ हजार ३०७, भदौलय् ४५ हजार ७२६, असोजय् ३८ हजार ५९७ व मंसिरय् २५ हजार १८३ म्ह संक्रमित थपे जुइगु सम्भावना दु ।
थ्वहे झ्वलय् स्वास्थ्य राज्यमन्त्री उमेश श्रेष्ठं थ्वहे वइगु असोज महिना दुने १ करोड ५ लाख डोज खोप वइगु खँ धयादीगु दु । म्हिगः सांसदपिंसं न्यंगु न्ह्यसःया लिसः बिसें राज्यमन्त्री श्रेष्ठं थ्वहे वइगु शनिवाः व आइतवाः ८ लाख एस्ट्राजेन खोप वइगु व निगूगु चरणय् थप ८ लाख खोप वइगु जानकारी बियादीगु खः ।
उकथं हे चीनं थ्वहे वइगु १५ तारिख दुने १६ लाख खोप वइगु खँ कनादीगु दुसा चीनं साईनोर्फामया थप ६० लाख जानकारी बिसें भारतं नं १० लाख खोप वइगु खँ कनादीगु दु । उकथं हे भुटानपाखें तकं नेपाःयात ३ लाख डोज कोभिशिल्ड खोप वयेगु झ्वलय् दुगु खँ नं वय्कलं कनादिल ।
अथे हे आः वइगु पुस महिना तक मोर्डनाया ४० लाख खोप, कोभेक्स गाभीया १ करोड १० लाख डोज, विश्व स्वास्थ्य संगठनया अनुदानय् कोभेड गामी १ करोड १३ लाख डोज खोप वइगु जानकारी नं राज्यमन्त्री श्रेष्ठं बियादीगु दुसा अमेरिकां नं ६० लाख डोज फाईजर खोप बीत्यंगु दु । फाइजर खोप १२ निसे १८ दँया पुचःयात बीगु खँ नं मन्त्री श्रेष्ठं कनादिल ।
थ्वहे झ्वलय् म्हिगः जक स्वनिगलय् १०५५ म्ह कोरोना संक्रमण पुष्टि जूगु दु । स्वास्थ्य मन्त्रालयया कथं येँय् ७६६ म्ह, यलय् १६३ म्ह व ख्वपय् १४६ म्ह संक्रमित पुष्टि जूगु खः । म्हिगः देय्न्यंकं ३९३८ म्ह कोरोना भाइरस संक्रमण जूगु खः ।स्वनिगलय् वंगु वालंनिसें धमाधम हे कोरोना संक्रमित जूपिनि ल्याः थपे जुजुं वनाच्वंगु दु ।
LEAVE YOUR COMMENTS