लाल प्रतिवेदन बारे सरकारयात आदेश

येँ – कैलालीइ थारूतय् विरुद्ध जूगु दमन बारे छानबिन यायेत गठित पूर्वन्यायाधीश गिरिशचन्द्र लालया आयोगं तयार याःगु प्रतिवेदन सार्वजनिक याये जिउगु खः लाकि मखु स्वलाया दुने लिसः बिउ धकाः सर्वोच्च अदालतं सरकारयात आदेश बिउगु दु ।

म्हिगः प्रधानन्यायाधीश चोलेन्द्र शमशेर राणा व न्यायाधीश सपना मल्ल प्रधानया मंकाः इजलाशं थ्व प्रतिवेदन सार्वजनिक याये मजिउगु खःसा छु कारणं मजिउगु खः कारण समेत खुले यानाः लिसः बिउ धकाः सरकारया नामय् आदेश जारी याःगु खः । अधिवक्ता शशीधर पाण्डेयं आयोगया प्रतिवेदन सार्वजनिक यायेमाः धासें गृह मन्त्रालययात विपक्षी दयेकाः सर्वोच्चय् रिट दर्ता यानातःगु खः । राष्ट्रिय जनता पार्टीं नं थ्व आयोगया रिपोर्ट सार्वजनिक यायेमाः धकाः माग याना वयाच्वंगु दु ।