ने. सं. ११४४ ञलाथ्व नवमी -

मिस्तय्त वैदेशिक रोजगारय् तयातःगु प्रतिबन्ध चिइकेगु तयारी

येँ – छेँज्याया निंतिं मिसापिं ज्यामित माग वयेवं सरकारं कतार, साउदी अरेबिया व युनाइटेड अरब इमिरेटस लिसें द्विपक्षीय सम्झौता यायेगु तयारी याःगु खँ सीगु दु । थुपिं देशय् मिसापिं ज्यामि छ्वयेत प्रतिबन्ध तयातःगु दु । आः थनं नं मिसापिं ज्यामितय् माग अप्वया वयेवं श्रम सम्झौता हे यानाः मिस्तय्त नं थुपिं देशय् छ्वयेगु तयारी याःगु खः ।

थुपिं देशय् मिस्त छ्वयेत प्रतिबन्ध तयातःगुलिं अवैध ढंगं जूसां मिस्त उखे वनाच्वंगु व उपिं झन जोखिमय् लानाच्वंगुलिं नं आः प्रतिबन्ध फुकुवा यायेगु तयारी जुयाच्वंगु खँ धाःगु दु । थुपिं देशय् नेपाःया श्रम सम्झौता मदुगुलिं नेपाली मिस्त भारत जुयाः नं कतार, सउदी व युएइलय् वनाच्वंगु दु । छुं हे सम्झौता मदुगु व अवैध रुपं वनीगु जूगुलिं अन वनाच्वंपिं मिस्त श्रम शोषण लानाच्वंगु खँ धाःगु दु ।

थथे हे समस्या जुयाः छुं ई न्ह्यव नेपालं जोर्डन लिसे नं श्रम सम्झौता याःगु खः । थ्व सम्झौता लिपा नेपाली मिस्त नं जोर्डनय् छेँज्याया निंतिं वनेगु लँ चाःगु खँ धाःगु दु । कतार, युएइ व सउदी लिसे नं श्रम सम्झौता जुल धाःसा थन नं मिस्त वैदेशिक रोजगारया निंतिं वनेफइगु खँ धाःगु दु ।

नेपाली मिस्त थौंकन्हय् दक्षिण कोरिया व इजरायलय् वैदेशिक रोजगारया निंतिं वनाच्वंगु दु । दक्षिण कोरियाय् इपिएस मार्फत भाषा परीक्षा बियाः वनाच्वंगु खःसा इजरायलय् नं अनया बुराबरीतय् हेरचाहया निंतिं केयर गिभरया रुपय् वनाच्वंगु दु ।श्रम रोजगार व सामाजिक सुरक्षा मन्त्रालयया सचिव महेश दाहालं कतार, सउदी व कुवेतय् मिस्त ज्यामि वनेगु निंतिं तयातःगु प्रतिबन्ध फुकुवा यायेगु निंतिं सहलह जुयाच्वंगु खँ धयादीगु दु ।

बिबिसीलिसे खँ ल्हासें वय्कलं धयादीगु दु, ‘कतार, सउदी अरेबिया, युएइ थेंज्याःगु देशय् छेँज्याया निंतिं मिसापिं ज्यामितय् माग अप्वया वनाच्वंगु दु । यदि थन मिसापिं ज्यामि छ्वयेगु खःसा निगू देय् दथुइ श्रम सम्झौता व घरेलु कामदारया सन्दर्भय् बिस्कं बिस्कं हे सम्झौता जुइमाः धकाः सहलह यानाच्वनागु दु ।’

प्रतिबन्ध तयातःगुलिं अवैध रुपं कुवेत व इराक वनेत्यंपिं झिंखुम्ह मिस्तय्त वंगु मंगलवाः जक भारतया न्हूदिल्लीं उद्धार यानाहःगु दु ।
मानवतस्करतय्सं मिस्तय्त यक्व कमाइ दइगु प्रलोभन क्यनाः प्रतिबन्ध तयातःगु देशय् छ्वयाच्वंगु खँ धाःगु दु । उकिं नं मिसापिं ज्यामितय् माग दुगु देशय् याकनं श्रम सम्झौता यायेमाःगु खँ विज्ञतय्सं धयाच्वंगु दु ।

वैदेशिक रोजगारया निंतिं अवैध रुपं वनेत्यंपिं मिस्तय् उद्धार व पुनस्र्थापना ज्या यानाच्वंम्ह मञ्जु गुरुंंगं धयादी, ‘सुं नं मिस्त मिजंत सरह सरकारी अभिलेखय् अभिलेखीकरण यानाः स–सम्मान वैदेशिक रोजगारी वनेदइगु वातावरण दयेके हथाये जुइधुंकल ।’

‘अप्वः थें मिस्त घरेलु ज्यामिया रुपय् वनी, अले वैदेशिक रोजगारय् वनीपिं मिस्तय्त जोखिमपूर्ण रुपं वनेमाःगु अवस्था सरकारं हे यानाच्वंगु दु । थुकियात सम्बोधन यायेत नं घरेलु कामदार श्रम सम्झौता यायेमाः’ वय्कलं धयादीगु दु ।सरकारं प्रतिबन्ध तयामतःगु देशय् नं श्रम सम्झौता मयाःगुलिं मिस्त अवैध लँपु जुयाः वैदेशिक रोजगारय् वनेत बाध्य जुयाच्वंगु खँ धाःगु दु ।

कतार, साउदी अरेबिया व युनाइटेड अरब इमिरेटसय् मिस्त छ्वयेत प्रतिबन्ध तयातःगुलिं अवैध ढंगं जूसां मिस्त उखे वनाच्वंगु व उपिं झन जोखिमय् लानाच्वंगु दु