गुंगू तःधंगु बैंक व वित्तीय संस्थाया शेयर कमजोर

येँ – छुं ई न्ह्यव तक बैंक व वित्तीय संस्थाया शेयर न्यायेगुयात तःधंगु प्रतिष्ठाया विषय कथं नाला वयाच्वंगु खः । सर्वसाधारण घण्टौं तक लाइन च्वनाः शेयर न्यायेत वइगु खः । लिपांगु इलय् मदिक्क कुहां वयाच्वंगु शेयर बजाःया कारणं क वर्गया बैंक व वित्तीय संस्थाया शेयरया भाः नं म्हो जुया वनाच्वंगु दु ।

थुकिं पुलांपिं लगानीकर्ता समस्याय् लानाच्वंगु दुसा न्हूपिं लगानीकर्तातय्त धाःसा ह्वःताः बियाच्वंगु दु ।नेपाल स्टक एक्सचेञ्जया कथं गुंगू बैंक व वित्तीय संस्थाया शेयर आधारभूत मूल्यया हाराहारीइ थ्यनाच्वंगु दु । शेयर बजारय् न्हूपिं लगानीकर्तातय् लागि थ्व सुखद् ई जूसां कारोवार यानाच्वंपिं लगानीकर्तातय् निंतिं धाःसा भाः कुहां वनाः समस्या जुयाच्वंगु दु ।

शेयर बजाः कुहां वनाच्वंगु कारणं तःधंगु बैंकया शेयर आधारभूत मूल्यया तहय् थ्यनेवं न्हूगु लगानीकर्तायात लगानीया ह्वःताः चूलाःगु दु ।
नेपाल स्टक एक्सचेञ्जया कथं सेञ्चुरी बैंकया प्रति शेयर भाः १६९ तका दु । थगुने भदौया निगूगु वालय् थ्व बैंकया शेयर भाः २२७ तका थ्यनाच्वंगु खः । अथेहे सिभिल बैंकया भाः नं कुहां वंगु दु ।

थ्व बैंकया प्रतिशेयर भाः १४८ तका दु । थगुने भदौ महिनाय् थ्व बैंकया शेयरया भाः २३० तकां न्यायेमी जुयाच्वंगु खः । जनता बंैकया शेयर भाः छगू कित्ताया १५३ तका थ्यनाच्वंगु दु । वंगु बिहिवाःया तथ्यांक कथं थ्व बैंकया शेयर भाः निरन्तर कुहां वनाच्वंगु दु । थगुने भदौ महिनाय् थ्व बैंकया शेयर भाः २५४ तका थ्यनाच्वंगु खः ।

अथेहे मेगा बैंकया शेयर नं १६१ तका थ्यंगु दु । थगुने थ्व बैंकया शेयर भाः छगू कित्ताया ४४९ तका थ्यनाच्वंगु खः माछापुच्छ«े बंैकया शेयर नं निगूगु बजारय् कमजोर खने दयाच्वंगु दु । थ्व बैंकया शेयर वंगु बिहिवाः २०४ तकां न्यायेमी जूगु खः । थगुने भदौलय् थ्व बैंकया शेयर भाः ३२७ तका थ्यनाच्वंगु खः ।

अथेहे नेपाल बंगलादेश बैंक नं शेयर बजारय् कमजोर जुया वनाच्वंगु दु । थ्व बैंकया भाः प्रति कित्ता १९९ तका दु । वंगु भदौ महिनाय् थ्व बैंकया शेयर भाः छगू कित्ताया ३३२ तका थ्यनाच्वंगु खः । अथेहे एनसिसि बैंकया शेयर नं कुहां वनाच्वंगु दु । थ्व बैंकया शेयर प्रतिकित्ता १८० तकां न्यायेमी जुयाच्वंगु दु । वंगु दँय् भदौ महिनाय् ३६४ तकां कारोवार जुयाच्वंगु खः ।

अथेहे प्रभु बैंकया शेयर प्रतिकित्ता १८० तकां न्यायेमी जुयाच्वंगु दु । थगुने भदौलय् ३७० तकां कारोवा जुयाच्वंगु खः । सिटिजन बैंकया प्रतिकित्ता २३५ तका, ग्लोबल आइएमई बैंकया २९६ तका, लक्ष्मी बैंकया २३३ तका, बैंक अफ काठमाडौंया २८९ तका, नेपाल बैंकया २८६ तका, एनएमबी बैंकया ३१६ तका, प्राइम बैंकया २९५ तका, सनराइज बैंकया २२० तका, एनआइसी एसिया बैंकया ३४० तका व सानिमा बैंकया ३२० तका थ्यनाच्वंगु दु ।

स्वंगू बैंकया शेयर जक थहां वन
नेपाल स्टक एक्सचेञ्जय् सुचीकृत २७ गू वाणिज्य बैंक मध्ये वंगु बिहिवाः स्वंगु बैंकया शेयर जक न्यासः तकां च्वय् दु । स्टायण्डर्ड चार्टर्ड बैंकया भाः प्रति कित्ता ७१५ तका थ्यनाच्वंगु दु । थगुने थ्व बंैकया शेयर छगू कित्ताया २२०१ तकां कारोवार जूगु खः ।

नबिल बैंकया शेयर भाः छगू कित्ताया ९४७ तका दु । थगुने थ्व बैंकया शेयर १६६५ तका थ्यंगु खः । अथेहे एभरेस्ट बैंकया शेयर भाः ६५८ तका दु । थगुने १२६६ तकां कारोवार जूगु खः । नेपाल एसबिआई बैंकया शेयर भाः ४९३ तका थ्यनाच्वंगु दु ।

न्हूपिं लगानीकर्तायात ह्वःताः
शेयर बजाः विश्लेषक प्रकाश तिवारीया कथं सुरक्षित लगानी याये चाहे जूपिंसं बैंक तथा वित्तीय संस्थाया शेयरय् लगानी यायेगु अवसर वःगु दु । याकनं फाइदा कायेमाःपिं व म्होचा लगानी यानाः यक्व नाफा कमे याइपिंत धाःसा वित्तीय क्षेत्र स्वयां पिनेगु क्षेत्र हे उपयुक्त दु ।

सामान्यतः बैंक व वित्तीय संस्थाया शेयरय् जोखिम म्हो जुइगुलिं नं नागरिकतय् आकर्षक दयाच्वनीगु खः । वियरिस ट्रेन्डय् दुुगु बजाःया प्रभाव थ्व क्षेत्रय् नं लाःगु दु । विश्लेषक तिवारीया कथं क वर्गया बैंक व वित्तीय संस्थाया शेयर आधारभूत मूल्यया हाराहारिइ थ्यंगु न्हूपिं लगानीकर्तातय् निंतिं ह्वःताः खः ।