
येँ – श्रीस्वस्थानी बाखंया ‘लावण्य देश’या नामं नांजाःगु सक्वय् पर्यटकीय विकासया सम्भावना अप्वया वनाच्वंगु दु । येँ जिल्लाय् हे लाःसां नं लिउने लानाच्वंगु थ्व क्षेत्रय् ऐतिहासिक, धार्मिक व पर्यटकीय महत्व दुगु क्षेत्रया लिसें जहरसिंह पौवा थेंज्याःगु पिकनिक स्थल, देउरालीइ संचालित प्याराग्लाइडिङ्ग व स्थानीय होटलत चालावयेवं पर्यटकीय चहलपहल अप्वया वःगु दु ।
नाराखुसि, मणिचूड डाँडा, वज्रयोगिनी, इन्द्रायणी सलम्बुदेवी, विश्वम्भरा नारायण थेंज्याःगु धार्मिक क्षेत्रया कारणं थन दँय्दसं धार्मिक पर्यटकतय् ल्याः अप्वया वनाच्वंगु दु । थ्व क्षेत्रया थप विकास यानाः प्राकृतिक पहाडी, वन जंगल, मणिचुड, झुले देउराली, जहरसिंह पौवा व थाना भञ्ज्याङ्गयात पर्यटकीय व धार्मिक क्षेत्रया रुपय् विकास यायेत सक्व नगरपालिकां बजेट विनियोजन याःगुलिं नं थन पर्यटकीय विकास जुइगु सम्भावना अप्वया वःगु दु ।
स्वयम्भू, बौद्ध, मणिचूड, वज्रयोगिनी व काभ्रेया नमूरातक बौद्ध परिपथ कथं विकास यायेगु निंतिं नं नगरपालिकां विस्तृत परियोजना प्रतिवेदन दयेकेगु तयारी याःगु दु ।वि.सं. २०६८या जनगणनाकथं २५ हजार ३३८ जनसंख्या दुगु व ६०.२१ वर्गकिलोमिटर क्षेत्रय् न्यनाच्वंगु ३३०० दँ न्ह्यव दयेकूगु शंख आकारया सक्व देय् थन दुगु न्यागू मौलिक ध्वाखाया कारणं नं सकसिनं म्हसिउ ।
सिन्धुपाल्चोक, काभ्रेपलाञ्चोक व ख्वप जिल्ला लिसे स्वानाच्वंगु सक्व नगरपालिकाय् लाःगु पिकनिकस्थल जहरसिंह पौवां हिमाल, सूर्याेदयया अवलोकन यायेफु । थन नकतिनि हे दयेकूगु स्तम्भया कारणं नं चहपह अप्वःगु दु । थाना भञ्ज्याङ्गय् केबुलकार तयेगु निंतिं नं पहल सुरु जूगु दु ।
मुक्कं भूभागया ३६ प्रतिशत जंगल दुगु सक्वय् जंगल सफारी, बंगुरपालन, हाइकिङ्ग, जाकि व आलुया बजाः विस्तार थेंज्याःगु ज्याय् नं नगरपालिकां पहल यानाच्वंगु दु ।
मुक्कं भूभागया ३६ प्रतिशत जंगल दुगु सक्वय् जंगल सफारी, बंगुरपालन, हाइकिङ्ग, जाकि व आलुया बजाः विस्तार थेंज्याःगु ज्याय् नं नगरपालिकां पहल यानाच्वंगु दु ।नगरपालिकाया प्रमुख सुवर्ण श्रेष्ठं विनाशकारी भुखाचं क्षति जूगु सम्पदा व भवनया पुनःनिर्माण यानाः पर्यटनयात न्हापांगु प्राथमिकता बियाः नगरवासीतय्त समृद्धि बीगु ज्याय् थःपिं लगे जुयाच्वनागु खँ कनादिल ।
वि.सं. २०७२ या भुखाचं थ्व नगरपालिकाय् जक १०८ म्ह सीगु खःसा खुद्वः छेँ ध्वस्त जूगु खः । वय्कलं मौलिकता झल्के जुइगु छेँ पुनःनिर्माणया निंतिं राष्ट्रिय पुनःनिर्माण प्राधिकरणं बीगु अनुदानय् नगरपालिका पाखें थप छगू लाख बीगु नीति दयेकागु नं खँ कनादिल ।
नगरपालिकां चीनया ल्हासा नगरपालिका व अन्तर्राष्ट्रिय बौद्ध पर्यटन केन्द्रया ग्वाहालिं चाँपाबोट व चिहानडाँडाय् स्रङचङगम्पो व भृकुटीया पार्क दयेकेत बजेट विनियोजन नं यायेधुंकूगु दु । नगर क्षेत्र दुनेया धार्मिक, सांस्कृतिक, पर्यावरणीय पर्यटनया सम्भाव्यता न्ह्यब्वयेत नगरस्तरीय एकीकृत पर्यटकीय गुरुयोजना तयार यायेगु खँ नं प्रमुख श्रेष्ठं कनादिल ।
अथेहे जःलाखलाय् लाःगु कागेश्वरी मनहरा व गोकर्णेश्वरी नगरपालिका दुथ्याःगु अन्तरनगर समन्वय समितिया पहलय् तारेभिर निसें जहरसिंह पौवा कात्तिकेतक्क साइकलिङ्ग व पदमार्ग निर्माणया निंतिं आवश्यक ज्या नं न्ह्याकेधुंकूगु दु ।शंखरापुर होटेल एशोसियसनया अध्यक्ष सुमन थापाया कथं आःतक थ्व क्षेत्रय् होटल व्यवसायया निंतिं छगू अर्ब ६५ करोड लगानी जुइधुंकूगु दु ।
थन दुगु ३८ गू होटलय् न्यासःगू क्वथा दयेधुंकूगु दु । अथेहे याकनं हे फाइभस्टार होटल नं दयेकेगु तयारी जुयाच्वंगु दुसा होमस्टे संचालनया नितिं नं तयारी जुयाच्वंगु दु ।देउरालीस्थित शंखरापुर प्याराग्लाइडिङ प्रा.लिया संचालक कुशल थापां नियमित संचालनया हिसाबं प्रदेश नं. ३ या न्हापांगु प्याराग्लाडिङ थःम्हं संचालन यानागु व थगुने स्वसःम्ह पर्यटकतय्त मनोरञ्जन याःगु खँ कनादिल ।
शङ््खरापुर खेलकूद विकास समितिया अध्यक्ष बद्रीप्रसाद चौलागाईं कासा, पर्यटन व विकासयात स्वानाः स्थानीय युवाया भावना लिसे नगरया समृद्धिया वातावरण दयेकेगु सुरु यानागु खँ कनादिल ।
LEAVE YOUR COMMENTS