भुखाय् पीडितया २ प्रतिशत ब्याज कायम
येँ भुखाय् पीडित जनतायात सरकारं २ प्रतिशत ब्याजदरं बिउगु त्यासायात निरन्तरता बीत नेपाल राष्ट्र बैंकं तयारी यानाच्वंगु खँ राष्ट्र बैंकया प्रवक्ता नारायणप्रसाद पौडेलं ‘नेपालभाषा टाइम्स’ यात कनादिल । थुकिया लागिं थःपिंसं भुखाय् पीडित जनतायात हित जुइगु छगू नीति हे दयेकाच्वनागु खँ नं वय्कलं कनादिल ।
राष्ट्र बैंकया निर्णय निन्हु प्यन्हुं परिपत्र जुइगु जानकारी नं वय्कलं बियादिल । २ प्रतिशत ब्याजदरया त्यासा न्हापा सरकारं घोषणा याः थें झिदँया हे जुइगु खँ वय्कलं कनादिल । उकिया निंतिं राष्ट्र बैंकं ५ अर्ब तकाया पुनर्कर्जा व्यवस्था यायेगु तयारी यानाच्वंगु दु । थ्व ध्यबा अर्थ मन्त्रालयपाखें सोधभर्ना जुइगु कथं व्यवस्था यायेत्यंगु जानकारी नं वय्कलं बियादिल ।
भुखाय् पीडित जनतां न्हापा झिदँया निंतिं धकाः थीथी वाणिज्य बैंकपाखें त्यासा काःगु खःसा लिपा नेपाल राष्ट्र बैंकं पुनर्कर्जाया ऐन संशोधन यानाः निदँया निंतिं जक त्यासा बीगु धायेवं वाणिज्य बैंकतय्सं आः त्यासा काःपिंसं नं बैंक ब्याजदर सरह ब्याज पुलेमाल धकाः पौ च्वया छ्वःगु खः । थुकिं यानाः थारान्हूपिं भुखाय् पीडिततय्सं राष्ट्र बैंक लिसें अर्थमन्त्री डा. युवराज खतिवडायात नापलानाः थःपिनिगु समस्यायात कयाः थुइकेगु ज्या याःगु खः ।
पीडित जनतायात नापलायेगु झ्वलय् अर्थमन्त्री खतिवडां भुखाय् पीडित जनताया समस्याय् थः गम्भीर जूगु धासें याकनं हे समस्या समाधान यायेगु बचं बिउगु खः । तर राष्ट्र बैंकं धाःसा भुखाय् पीडित जनताया समस्याय् अनुदार जुयाच्वंगु द्वपं भुखाय् पीडित जनतां बियाच्वंगु खः ।
LEAVE YOUR COMMENTS