न्हापांगु फिल्म फ्लप जूपिं बलिउड स्टार

फस्ट इम्प्रेशन इज लास्ट इम्प्रेशन धइगु छपु अंग्रेजी धापु दु । थ्व धापु कथं न्हापांगु पलाखय् त्वःतूगु छाप हे लिपातक ल्यनाच्वनी धयागु खनेदु । फिल्मख्यलय् नं थ्व धापूयात आपाःसिनं नालाकायेगु याः । विशेष यानाः एक्टिंगया ख्यलय् पलाः न्ह्याकीपिं स्टारतसें थःगु न्हापांगु फिल्म यानिकि डेब्यू फिल्म हिट सुपरहिट जुइमा धकाः मति तइ ।

गुलिखे स्टारतय्गु न्हापांगु फिल्म हिट सुपरहिट नं जूगु दु । अज्याःपिं मध्ये गुलिखे स्टारतय्गु पलाः क्वातुक्क न्ह्याइसा गुलिसिया पलाः लिपा वनाः दिनावनी । “सावन भादो” थेंज्याःगु छगू जमानाया हिट फिल्मया हिरो नवीन निश्चल अले “लव स्टोरी” थेंज्याःगु सुपरहिट फिल्मया हिरो कुमार गौरव लिपा अनवं–थनवं मदयेक तनावन ।

कुमार गौरवयात उगु ईया तसकं लोकंह्वाःम्ह स्टारसनया रुपय् बय्बय् याःगु खः । वया अबु राजेन्द्र कुमार धयाम्ह थःगु जमानाया तसकं हे नांजाःम्ह स्टार खः । उकिं कुमार गौरवयात उगु ईया छम्ह तसकं हे आस यायेबहम्ह स्टारया रुपय् कयातःगु खः । तर कुमार गौरवया “लभस्टोरी” धुंकाः रिलिज जूगु “रोमान्स”, “तेरी कसम”, “जुर्रत” थेंज्याःगु छगू नं फिल्मं छुं नं छाप त्वःते मफुत ।

कुमार गौरवया न्हापांगु फिल्म ला हिट जुल तर लिपा वयागु फिल्म हिट मजुल । बलिउडय् गुलिखे स्टार सुपरस्टार अज्याःपिं दु, गुम्हेसिया न्हापांगु फिल्म धाःसा हिट मजू तर लिपा वनाः बलिउडय् स्टार सुपरस्टारया रुपय् इमिसं न्हाय् धस्वाका क्यन ।

न्हापांम्ह सुपरस्टार
थःगु न्हापांगु फिल्मं फ्लप धकाः त्वःतूगु छाप लिपा वनाः हुयाः स्टार–सुपरस्टार जुइत ताःलाःपिं धइपिं राजेश खन्ना व अमिताभ बच्चन नं खः । बलिउडया न्हापांम्ह सुपरस्टार कथं कयातःम्ह राजेश खन्ना धइम्ह उगु जमानाय् जूगु छगू धेंधेंबल्लाखय् झिद्वः मनूतय्त त्याकाः हिरो जूवम्ह खः ।

थथे “ट्यालेन्ट हन्ट” कासाय् त्याकाः बलिउडय् इन्ट्रि याःम्ह राजेश खन्नाया न्हापांगु फिल्म “आखरी खत” खः । चेतन आनन्द थेंज्याःम्ह उगु जमानाया टप डाइरेक्टरया थ्व फिल्म धाःसा फ्लप जुल । थ्व छगू जक मखु राजेश खन्नाया न्हापांगु फिल्मया झ्वलय् लाःगु “राज”, “बहारों के सपने”, “औरत” नांयागु छगू धुंकाः मेगु फिल्म फ्लप जूबलय् वं थः हिरो जुयाः नयेफइमखुत धकाः तकं बिचाः यात, तर वयागु बिचाःयात “आराधना” नांयागु फिल्मं हिलाबिल ।

“आराधना” हिट जक मखु सुपरहिट हे जुल । उलि जक मखसे व धुंकाः वयागु झिंन्यागू फिल्म छगू धुंकाः मेगु लगातार हिट जुल । आःतक नं थ्व रेकर्डयात सुनांनं त्वाःथले मफुनि धाइ ।

अमिताभ बच्चनया खँ
राजेश खन्ना धुंकाः बलिउडय् थःगु पलाः क्वातुकेत ताःलाःम्ह धयाम्ह अमिताभ बच्चन खः । “जंजीर” नांयागु फिल्मं अमिताभयात बलिउडया मेगा स्टारया रुपय् थनेहल, तर वसिबें न्ह्यः रिलिज जूगु अमिताभया छगू नं फिल्म हिट मजू । वयागु न्हापांगु फिल्म “सात हिन्दुस्तानी” खः ।

वयागु थ्व फिल्म बांमलाक हे फ्लप जूगु खःसा व धुंकाः रिलिज जूगु “रेशमा और शेरा”, “बम्बे टु गोवा”, “परवाना”, “रास्तेका पत्थर” थेंज्याःगु छगू नं फिल्म हिट मजू । तर “जंजीर” धुंकाः वयागु फिल्मत धमाधम हिट सुपरहिट जुइगु शुरु जुल । उकिं बलिउडय् फस्ट ईम्प्रेशन इज लास्ट धइगु धापू उलि पाय्छि मजू धायेमाः ।

थौकन्हय्या खँ
उगु जमानाया सुपरस्टारतय्गु चर्चा धुंका आः थ्व ईया स्टारतपाखे छक्वः मिखाब्वये । थगुने “सञ्जु” थेंज्याःगु छगू तसकं हे लोकंह्वाःगु फिल्म म्हितूम्ह रणवीर कपुरयात थौंकन्हय् बलिउडया न्हूम्ह सुपरस्टार धायेगु यानातःगु दुसा वयागु न्हापांगु फिल्म “साँवरिया” खः । संजय लीला भंसाली थेंज्याःम्ह तसकं हे बांलाःम्ह फिल्म निर्देशकया थ्व फिल्म धाःसा हिट मजुल ।

तर लिपा वनाः रणवीर कपुरया “बर्फि”, “बचना ए हसिनों” निसें वयागु हिट फिल्मया यात्रा शुरु जुल । रणवीर कपुरलिसे हे “साँवरिया” फिल्मं डेब्यु याःम्ह सोनम कपुरया नं न्हापांगु फिल्म फ्लप हे जूगु खः । थुगुसी रिलिज जुइगु फिल्मय् तसकं हे बय्बय् जुयाच्वंगु छगू फिल्म “साहो” नं खः ।

“बाहुबलि” फिल्मया हिरो प्रभासया थ्व न्हूगु फिल्मया हिरोइन श्रद्धा कपुर नं बलिउडया छम्ह स्टार खःसा वयागु डेव्यु फिल्म “तीन पत्ती” नं फ्लप फिल्म खः । जबकि थ्व फिल्मय् बलिउडया मेगास्टार अमिताभ बच्चन व हलिउडया स्टार बेन किंग्स्लेया नापनापं साउथया स्टार आर. माधवन थेंज्याःपिं स्टारत दुगु खः ।

खान सुपरस्टारत
थौंकन्हय्या खान सुपरस्टार धयातःपिं सलमान खान, आमिर खान व शाहरूख खान मध्ये सलमान खानया न्हापांगु फिल्म नं फ्लप हे खः । आपाःसिनं सलमान खानया न्हापांगु फिल्म “मैने प्यार किया” धकाः च्वनी । थ्व ला छगू सुपरहिट फिल्म खः, तर वयागु डेव्यु फिल्म धाःसा थ्व मखसे “बीबी हो तो ऐसी” खः ।

थुकी वं साइड हिरोया रोल म्हितूगु खः । थ्व फिल्मया हिरो फारुख शेख खः अले हिरोइन रेखा खः । अथे हे तुं “कयामत से कयामत तक” हे आपाःसिनं आमिर खानया न्हापांगु फिल्म धकाः बिचाः याइ, तर मखु । वयागु न्हापांगु फिल्म “होलि” खः । कलेजय् जुइगु विद्यार्थी राजनीतिया बाखनय् दयेकातःगु थ्व फिल्मय् आमिर खानं दकलय् न्हापां म्हितूगु खः ।

शाहरूख खानया मामलाय् धाःसा वं साइन याःगु न्हापांगु फिल्म धइगु हेमा मालिनीं निर्देशन याःगु “दिल आशना है” खः । थ्व फिल्म सन् १९९२ या डिसेम्बर २५ य् रिलिज जुयाः फ्लप जूगु खःसां वयागु रिलिज जूगु न्हापांगु फिल्म “दिवाना” धाःसा व हे दँय् यानि कि सन् १९९२ या जून २६ य् रिलिज जुयाः हिट जुइधुंकूगुलिं वयात वयागु न्हापांगु रिलिज फिल्म फ्लप जूगु धकाः धायेथाय् मंत ।

खान सुपरस्टारतय् जक मखु, थौंकन्हय्या गुलिखे सुपरस्टारतय्गु डेव्यु फिल्म फ्लप जूगु दु । थौं वयाः हिट फिल्मया निंतिं म्हसीका वयाच्वंम्ह अक्षय कुमारया न्हापांगु फिल्म “सौगन्ध” खःसा थ्व नं हिट जूगु फिल्म मखु । वयागु हिट फिल्मया यात्रा “खिलाडी” निसें तिनि शुरु जूगु खः । अक्षय कुमारलिसे हे तःगू हिट फिल्म बिउपिं स्टारत मध्ये सुनिल शेट्टीया न्हापांगु फिल्म “मै बलवान” अले सैफ अलि खानया “आशिक आवारा” नं फ्लप हे जूगु फिल्म खः ।

हिरोनीतय्गु खँ
हिरोनीत मध्ये छगू जमानाय् हेमा मालिनि व रेखाया नां तसकं जाः । लिपा वनाः श्रीदेवी व माधुरी दीक्षित नं स्टार हिरोनीया रुपय् न्ह्यःने वल । श्री व माधुरी धुंकाः काजोल अले काजोल धुंकाः रानी मुखर्जी व प्रिटी जिन्टा अले ऐश्वर्या राय नं स्टार सुपरस्टारया दर्जाय् थ्यंपिं हिरोनी खः । आपालं हिट फिल्म बिउम्ह हेमा मालिनीया न्हापांगु फिल्म “सपनोंका सौदागर” खः ।

उगु जमानाया नांजाःम्ह हिरो राज कपुरलिसे म्हितूगु हेमा मालिनीया थ्व फिल्म फ्लप हे जूगु खःसा “सावन भादो” फिल्मं हिट हिरोनीया रुपय् पलाः न्ह्याकूम्ह रेखाया न्हापांगु फिल्म धइगु विश्वजित हिरो दुगु “अन्जाना सफर” धाःसा रिलिज हे मजुल । झिदँति लिपा वनाः तिनि थ्व फिल्म “दो शिकारी”या नामं रिलिज जूगु खः ।

साउथया स्टार कथं लोकंह्वाःम्ह श्रीदेवीया बलिउडय् डेव्यु फिल्म “सोलहवाँ सावन” खः । अमोल पालेकर हिरो दुगु थ्व फिल्म फ्लप जूगु फिल्म खःसा लिपा वनाः जितेन्द्रलिसे हिरोनी जुयाः म्हितूगु “हिम्मतवाला” हिट जूबलय् तिनि वयागु बलिउड क्यारियर सुथांलाक्क न्ह्याःवंगु खः ।

अथे हे तुं “तेजाब” फिल्म हिट जूबलय् एक–दो–तीन गर्लया नामं हिट जूम्ह माधुरी दीक्षितया डेब्यु फिल्म “अबोध” फ्लप फिल्म खःसा व धुंकाः म्हितूगु “आवारा बाप” नं फ्लप हे जूगु खः । शाहरूख खानलिसेया हिट हिरोनीया रुपय् नांजाःम्ह काजोलया न्हापांगु फिल्म “बेखुदी” फ्लप फिल्म खः ।

काजोलया केहेँ लाःम्ह रानी मुखर्जीया न्हापांगु निगू फिल्म “मेहेन्दि” व “राजा की आएगी बारात”, अले रानीया एकज्यानम्ह पासा धयातःम्ह प्रिटी जिन्टाया डेब्यु फिल्म “दिलसे ” नं हिट मजूगु फिल्म खः । तर लिपा वनाः रानी व प्रिटी निम्हं बलिउडया स्टार जूपिं खः । थथे न्हापांगु फिल्म फ्लप जुयाः नं लिपा वनाः हिट स्टार जूम्ह छम्ह ऐश्वर्या राय नं खः ।

विश्व सुन्दरीया मतू पुयाः फिल्मय् हिरोनी जूवःम्ह ऐश्वर्य रायया न्हापांगु फिल्म “और प्यार हो गया’ खः । बबी देओल हिरो जुयाः म्हितूगु थ्व फिल्म हिट मजुलसा लिपा वनाः निर्देशक सुभाष घईया “ताल” फिल्म हिट जुइ धुंकाः वयागु पलाः क्वातुगु खः । थुकिं बलिउडय् फस्र्ट इम्प्रेशन इज लास्ट धइगु उलि पाय्छि मजू धयागु खँयात प्रष्ट याः धकाः धायेमाः ।

सम्बन्धित बुखँ

LEAVE YOUR COMMENTS