तलेजु भवानी गुह्येश्वरीइ बिज्याकल
येँ(नेपालभाषा टाइम्स)- थनया हनुमानध्वाखा लाय्कू लागाया तलेजु भवानीयात आइतवाः गुह्येश्वरीइ बिज्याकूगु दु । दँय्दसं कछलागा नवमिनिसें पशुपति लागाय् जुइगु गुह्येश्वरी द्यःया जात्राया निंतिं तलेजु भवानीया गुह्येश्वरीइ बिज्याकूगु खः । गुह्येश्वरीयात तता व तलेजु भवानीया केहेंया रुपय् पुजा यायेगु चलन दुगु पुजारी जेन कर्माचार्यं कनादीगु दु । तलेजु भवानीयात गुह्येश्वरीइ बिज्याकूयालिसें उकुन्हु हे बहनि तान्त्रिक व गुप्त पुजा नं याःगु पशुपति क्षेत्र विकास कोष अमालकोट कचहरीया द्वारे रामकृष्ण डंगोलं कनादीगु दु ।
हनुमानध्वाखास्थित तलेजु भवानीया देगलंनिसें तलेजुयात गुह्येश्वरीइ यंकेगु झ्वलय् यायेमाःगु सकतां विधि तान्त्रिक प्रक्रियापाखें पूवंकूगु खः । आइतवाः चछि गुह्येश्वरीइ धुनी जगे यानाः तःगु खःसा तलेजुया मूर्तियात गुह्येश्वरीया गर्भय तयाः पुजा आराधना नं याःगु खः । निगुलिं मूर्ति उथें उथें जूगुलिं तलेजुयात नं स्थानीयतय्सं गुह्येश्वरीया रुपय् हे माने यानाः पुज्यायेगु याना वयाच्वंगु दु ।
तलेजु द्यःयात गुह्येश्वरीइ यंके न्ह्यः ३२ कु हाकगु यःसिं नं थंगु खः । गुथि संस्थान पशुपति गोश्वारा ज्याकूया प्रमुख उमा आचार्ययाकथं तलेजु द्यः बिज्याके न्ह्यः हे यःसिं थनेगु ज्या क्वचायेकूगु खः । जात्रा क्वचायेवं म्हिगः बहनि हे यःसिं नं क्वःथःगु खः । थगु जात्रा जुजु जयप्रकाश मल्लया पालंनिसें शुरु जूगु खः ।
LEAVE YOUR COMMENTS