हाइकु ख्यः दछि क्यंगु लसताय् विशेष ज्याझ्वः

यल- नेवाः हाइकु ख्यः दछि फुनाः निदँ क्यंगु लसताय् आः नकतिनि छगू विशेष ज्याझ्वः जुल । हाइकु ख्यः निदँ क्यंगु लसताय् झिंस्वक्वःगु भर्चुअल हाइकु वाचनलिसें हाइकु दुवाला ज्याझ्वः जूगु खः ।

साहित्यया थीथी विधायात च्वन्ह्याकेत बिस्कं बिस्कं साहित्यिक संस्था दुगु व विधागत रुपं ज्याझ्वः नं जुया वयाच्वंगु थासय् हाइकु विधा च्वन्ह्याकेत उकथंया संस्था व ज्याझ्वःया अभावयात महसुस यानाः दछि न्ह्यः हाइकु ख्यः पलिस्था जूगु खः ।

हाइकु ख्यःया दुजः सुरेश प्रधानं लसकुस यासें न्ह्याकादीगु ज्याझ्वलय् मेम्ह दुजः दिलबहादुर चित्रकारं ज्याझ्वःया बारे जानकारी बियादिसें किपाया लिधंसाय् च्वयातःगु हाइकु गुकथं ल्ययाच्वना धइगु बारे नं जानकारी बियादीगु खः ।

न्यागू ब्वय् ब्वथलाः न्हापांगु ब्वय् च्याम्ह, निगूगुनिसें न्यागूगु ब्वतक न्हय्म्ह न्हय्म्ह हाइजिन यानाः मुक्कं स्वीखुम्ह च्वमिपिंत निकू निकू हाइकु वाचन याकूगु खः । वाचन जूगु हाइकुयात कयाः प्रा. डा. सुन्दरकृष्ण जोशी, डा. आनन्द जोशी, डा. ज्योतिप्रभा तुलाधर, ध्रुव मधिकःमि, नरेशवीर शाक्यं समीक्षा यानादीगु खः ।
साहित्यकारलिसें समालोचक डा. पुष्पराज राजकर्णिकारं वाचन जूगु दक्वं हाइकुयात कयाः समीक्षात्मक टिप्पणी यानादीगु खः ।

हाइकु ख्यलं सामाजिक संजाल फेसबुकया माध्यमं हाइकुया थीथी विषयवस्तुइ केन्द्रीत जुयाः ज्याझ्वः याना वयाच्वंगु दु । थ्व झ्वलय् वाःपतिकं छपाः किपा बियाः हाइकु च्वकेगु, हाइकुया विज्ञ व समालोचक, समीक्षकपाखें हाइकुया बारे जानकारी बीगु ज्याझ्वः याना वयाच्वंगु दु ।

थुकथं किपाया लिधंसाय् च्वया हःगु हाइकुयात ल्ययाः वाःया उत्कृष्ट हाइकुकथं झिकू हाइकु ल्ययेगु व समीक्षात्मक ज्याझ्वलय् निम्ह हाइजिनयात हाइकु वाचन याकेगु याना वयाच्वंगु खः । थुकथं वंगु दछिया दुने न्यय्निपाः किपा ब्वयाः हाइकु च्वकेगु झ्वलय् मिसा व मिजं यानाः सछि व गुम्ह हाइजिनपिनि न्यासः व चाःचू हाइकु दुहां वःगु जानकारी ज्याझ्वलय् बिउगु खः । हाइकु ख्यःया दुजः केशरमान ताम्राकारं नुगःखँ तयादीगु ज्याझ्वलय् धर्मकृष्ण सिँकःमिं सुभाय् देछानादीगु खः ।