पुनःनिर्माण जूगु सम्पदाया विवरण छ्वया हयेत इनाप
येँ(नेपालभाषा टाइम्स)- येँ महानगरपालिकां पुनःनिर्माण जुइधुंकूगु सम्पदाया विवरण महानगरय् छ्वया हयेत इनाप याःगु दु । येँ महानगरं २०७२ सालया विनाशकारी तःभुखाचं जीर्ण याःगु सम्पदामध्ये पुनःनिर्माण जुइधुंकूगु सम्पदाया धलः महानगरय् छ्वया हयेत इनाप याःगु खः ।
येँ महानगरया उपप्रमुख सुनिता डंगोलं अधिकार सम्पन्न बागमति सभ्यता एकीकृत विकास समितियात टेकु दोभानखण्डय् पुनःनिर्माण जूग्ु सम्पदाया विवरण महानगरय् छ्वया हयेत इनाप याःगु खः । वय्कलं २०७२ सालया विनाशकारी भुखाचं जीर्ण जुयाः पुनःनिर्माण क्वचायेकाः हस्तान्तरण जूगु सम्पदा व उकिया उपयोग विषयय् जूगु साझेदारतय् बैठकय् उकथं इनाप यानादीगु खः ।
बैठकय् उपप्रमुख डंगोलं सम्पदा क्षेत्रया संरक्षण, व्यवस्थापन, प्रवद्र्धन यायेगु दायित्व महानगरया खः धासें समितियाके दुगु अज्याःगु क्षेत्रया सम्पदा व पुनःनिर्माणसम्बन्धी विवरण महानगरय् छ्वया हयेत इनाप यानादीगु खः ।
एशियाली विकास बैंकया त्यासा ग्वाहालिपाखें थापाथलीनिसें टेकु दोभानतक स्वंगू चरणय् खुसि सुधार परियोजना अन्तर्गत न्हापांगु चरणय् टेकु दोभाननिसें टेकुया ताँतक जीर्ण सम्पदा पुनःनिर्माण व मर्मत सम्भारया ज्या जुइधुंकूगु दु । न्हापांगु चरयणय् थ्व लागाया ११ गू सम्पदा गुथि संस्थान व निजी गुथियात हस्तान्तरण तकं यायेधुंकूगु दु ।
थुकथं हे निगूगु व स्वंगूगु चरणय् टेकु ताँनिसें तुकुचा बागमति दोभान जुयाः थापाथाली ताँतकया खण्डय् लाःगु सम्पदा पुनःनिर्माण, मर्मत सम्भार व खुसिया जःखः सुन्दरता हयेगु ल्याखं पूर्वाधार निर्माणया ज्या जुयाच्वंगु दु ।
न्हापांगु चरणय् ३७ गू, निगू चरणया ज्या यायेत ४० गू व स्वंगूगु चरणय् ३५ गू करोठ लागत तुइगु अनुमान यानातःगु दु ।
बैठकय् येँ महानगरया प्रमुख प्रशासकीय अधिकृत वसन्त अधिकारीं महानगर दुने च्वंगु सम्पदाया एकीकृत व्यवस्थापन यायेगु दायित्व येँ महानगर खः धासें उकिया जिम्मा थःपिंसं कायेगु जुइ धयादिल । लिसें वय्कलं पुनःनिर्माण क्वचायेधुंकूगु थासय् च्वंगु मेमेगु सम्पदायात अथें त्वःते मिले मजू धासें उकिया निंतिं आंशिक मखसे एकीकृत रुपं सम्पदा संरक्षण व व्यवस्थापनया ज्या यायेमाः धयादिल ।बैठक लिपा सहभागि सकसिनं पुनःनिर्माण जूगु सम्पदाया अवलोकन यानादीगु खः ।
LEAVE YOUR COMMENTS