स्वंगू कारागारय् धर्मदेशना ज्याझ्वः

येँ – बौद्ध शिक्षा तथा सामाजिक विकास केन्द्र नेपालया ग्वसालय् लय्पतिकं न्ह्याना वयाच्वंगु बौद्ध धर्मदेशना वंगु शनिवाः जुल । केन्द्रया ग्वसालय् लय्पतिकं न्हापांगु शनिवाः न्ह्याका वयाच्वंगु धर्मदेशना वंगु शनिवाः भद्रबन्दी गृह, केन्द्रीय कारागार व महिला बन्दीगृहय् छगू हे इलय् जूगु केन्द्रया मूछ्यांजे विजयरत्न तुलाधरं कनादीगु दु ।

ज्याझ्वय् सिद्धिमंगल विहारं बिज्याःम्ह विहार प्रमुख भिक्षु विमलों धर्मदेशना बियाबिज्यासें ध्यान भावना नं स्यनेज्या याना बिज्याःगु खः । केन्द्रीय कारागारय् जूगु ज्याझ्वलय् विद्यासागर तुलाधरं लसकुस यानादीगु खःसा रामकृष्ण महर्जनं सुभाय् देछानादीगु खः । ज्याझ्वलय् मूछ्यांजे तुलाधरं ज्याझ्वःया उद्देश्यबारे जानकारी बियादीगु खःसा कारागार दुनेच्वंगु गुम्बाया नायः फुरी शेर्पां भिक्षु विमलो, ज्याझ्वः ताःलाकेत ग्वाहालि यानादीपिं सकसितं सुभाय् देछानादीगु खः ।

अथे हे भद्रवन्दी गृहय् जूगु ज्याझ्वलय् आनन्द भुवन विहारया प्रमुख भिक्षु समितं बन्दीपिनिगु निंतिं धर्मदेशना बियाबिज्याःगु खःसा केन्द्रया मूछ्यांजे तुलाधरं लसकुस यानादीगु खःसा संचारकःमि नापं उपासक विगेन तुलाधरं सुभाय् देछानादीगु खः । कारागारया बन्दी देवराज लामां ज्याझ्वः ताःलाकेत ग्वाहालि यानादीपिं सकसितं साधुवाद देछानादीगु खः ।

थुकथं हे महिला वन्दीगृहय् जूगु ज्याझ्वलय् धर्मकीर्ति विहारया श्रद्धाचारी गुरुमां नं धर्मदेशना बियाबिज्याःगु खःसा पत्रकार नापं उपासक कुमार रंजितं लसकुस यानादीगु खः । थन जूगु ज्याझ्वलय् ग्वसाः खलःया ग्वाहालिमि रोशना तुलाधर, प्रज्वल शाक्य, सुधा महर्जन व सन्जीव तुलाधरं नं थःथःगु विचाः तयादीगु खः ।