सर्वोच्च फैसलाया पुनरावलोकन याकीगु

येँ – स्वनिगःया थीथी थासय् जुयाच्वंगु सतक विस्तारया ज्याय् मुआब्जा व क्षतिपूर्ति बियाः जक ज्या न्ह्याके दइ धकाः सर्वोच्च अदालतं याःगु फैसलायात कयाः सरकारं पुनरावलोकन याइगु जूगु दु । सर्वोच्च अदालतं स्वनिगःया थीथी थासय् जुयाच्वंगु सतक विस्तार विरुद्ध लाःगु रिटया विषयय् वंगु असार १४ गते पूर्णपाठ बीधुंकाः सरकारं उकी पुनरावलोकन याकेत्यंगु खः । पूर्णपाठय् सतक विस्तार यायेगु झ्वलय् स्थानीय जनताया जग्गा कायेमाःसा जग्गा प्राप्ति ऐन कथं जग्गाया क्षतिपूर्ति बीमाःगु खँ न्ह्यथनातःगु दु ।

सर्वोच्च अदालतया फैसलां सतक विस्तारया ज्याय् पंगः थंगु धासें प्रधानमन्त्री, कानुनमन्त्री व महान्यायाधिवक्ताया दथुइ सहलह समेत जुइधुंकूगु खँ सीदुगु दु । उगु सहलह लिपा छुं न्हिया दुने पुनरावलोकनय् वनेगु तयारी सरकारं याःगु खः ।

सर्वोच्च अदालतया निर्णय चित्त बुझे मजुल धाःसा महान्यायाधिवक्ता मार्फत न्यायिक पुनरावलोकनय् वने फइगु व्यवस्था दु । पूर्णपाठया फैसला स्वम्ह न्यायाधीशपिं केदारप्रसाद चालिसे, हरिकृष्ण कार्की व पुरुषोत्तम भण्डारीं जारी याःगु खः । आः पुनरावलोकनया ज्या धाःसा न्याम्ह न्यायाधीश दुगु बेञ्चं याइगु खँ धाःगु दु ।

थ्वहे झ्वलय् सहरी विकासमन्त्री मोहम्मद इस्तिहाकराइं सतक विस्तार लगायत विकासया ज्याय् सर्वोच्च अदालतया फैसलां पंगः थनेगु ज्या यानाच्वंगु दु धयादीगु दु । अदालतया फैसला प्रति वय्कलं असन्तोष नं प्वंकादीगु खः ।